Два агратэхнічныя комплексы “Раса” набыло КСУП “Гудагай”
Па папярэдніх выніках аграномаў, азімыя збожжавыя і рапс добра перазімавалі, таму самы час іх падкарміць. Для гэтых мэт КСУП «Гудагай» да пачатку вясенне-палявых работ набыло два агратэхнічныя комплексы «Раса». За абкаткай аднаго з іх паназіраў карэспандэнт.
Гэтыя самаходныя апрысквальнікі айчыннай вытворчасці ў пэўнай ступені ўнікальна сканструяваны. Лёгкая прадукцыйная машына на тонкіх колах з эластычнымі шынамі дазваляе рабіць усё хутка і максімальна якасна. Раслінам у фазе вегетацыі, калі адбываецца іх інтэнсіўны рост, як паветра, неабходна «мінералка».
Аб’ездзіць новую «Расу» ў гаспадарцы даверылі Дзянісу Бароўку. Манціраваць штангі і нацягваць трасы прама ў полі механізатару дапамагаў яго напарнік, які падвозіць карбамідна-аміячную сумесь, Юрый Макарэвіч. У пары мужчыны працуюць другі сезон.
– Гэты агрэгат – палепшаная копія свайго папярэдніка. Захоп тут, напрыклад, складае ажно 24 метры, у былой «Расе» – 20. Яшчэ адна з пераваг – лёгкасць: поле не рэжа, – патлумачыў асаблівасць сельгасмашыны Дзяніс Бароўка.
Запытала ў механізатара, ад чаго залежыць паспяховасць працы на такім агрэгаце.
– Да любой тэхнікі прывыкнуць трэба. Думаю, хутка з гэтай «Расой» паразумеемся, тым больш што летась таксама на апрысквальніку працаваў. Праўда, таму комплексу было каля 15 гадоў, – працягнуў мужчына. – Галоўнае – правільна выставіць норму ўнясення сумесі, бо для кожнай культуры яна свая.
– За раз загружаю каля 11 тон рэчыва. «Раса» бярэ крыху больш за паўтоны. Пакуль толькі апрабоўваем апарат, таму пра аб’ёмы работ сказаць цяжка. Думаю, пасля абкаткі машыны і пры добрым надвор’і тэмпы значна паскорацца. Летась, напрыклад, за змену Дзяніс Бароўка найбольш апрацоўваў каля 120 гектараў.
