Конкурс «Пазнай Астравеччыну». Пяты этап
У чацвёртым туры конкурсу «Пазнай Астравеччыну», у параўнанні з папярэднім, паўдзельнічала значна менш астраўчан. Аднак адказы тых, хто пазнаў малюнак земляка Дзяніса Ходаса на валуне, былі разгорнутымі, а многія суправадзілі іх сваімі фотаздымкамі.
Па словах удзельніцы Алены Памецькі, почырк аўтара быў адразу зразумелы: гэта работа таленавітага земляка Дзяніса Ходаса. І хоць жыве ён зараз у сталіцы, але і пра малую радзіму не забывае: то міжнародны графіці-пленэр арганізуе, то цудоўнымі мураламі сцены горада ўпрыгожыць. Вось і прыдарожныя валуны вырашыў «ажывіць». «Смоўжык» (той, што на ўзбочыне шляху Жукойні – Кямелішкі) нават быў прызнаны лепшым у аглядзе анлайн-часопіса StreetArt360 .
А волат-мядзведзь прылёг адпачнуць паміж Гальчунамі і Малымі Якентанамі. На тым валуне калісьці парачка аленяў стаяла, якія цудадзейным чынам аднойчы некуды зніклі...
З чацвёртым заданнем конкурсу справілася 17 чалавек. Дзесяць з іх атрымалі па 1 балу за правільны адказ: Юлія Афоніна, Ванда Вайшнаровіч, Анастасія Гульбіновіч, Сяргей Жукоўскі, Кацярына Урбановіч, Жанна Волк-Леановіч, Лілія Кімса, Анастасія Котава, Рэгіна Замара, Алеся Абухоўская.
Алег Драган, Кацярына Вараб’ёва, Святлана Марозава, Марына Якімовіч і Ганна Мілашэвіч да правільных адказаў дадалі здымкі – і атрымалі па 2 балы кожны.
Цэлыя гісторыі з фота даслалі Марына Кімса і Алена Памецька – ім налічана па 3 балы.
Лідарамі конкурсу па выніках чатвёртага туру сталі Марына Кімса – 12 балаў, Алена Памецька – 11 балаў і Алег Драган – 8 балаў.
Дзе гэта, што гэта?
Нагадваем: далучыцца да конкурсу можна з любога этапу. Калі вы ведаеце, дзе гэта і што гэта, – дасылайце свае адказы, расповеды і фотаздымкі.
Адказы на пытанні конкурсу можна дасылаць у рэдакцыю па звычайнай ці электроннай пошце ці паведамляць па тэлефоне 2-03-64 на працягу пяці дзён (з улікам выхадных і святочных) пасля выхаду газеты з конкурсным заданнем (да аўторка ўключна).
Мадэратар праекта Ніна Рыбік