Cавет раённага аб'яднання прафсаюзаў падвёў вынікі года
На чарговым пасяджэнні савета раённага аб'яднання прафсаюзаў падведзены вынікі работы за 2017 год і абмеркаваны задачы на 2018-ы
Удзел у пасяджэнні Савета, акрамя прафсаюзных лідараў, прынялі прадстаўнікі раённай улады і дырэктар унітарнага прадпрыемства “Дом прафсаюзаў” Леанард Браніслававіч Багушэвіч.
Маніторынг тэрмінаў выплаты заработнай платы, наяўнасць ва ўстановах і на прадпрыемствах пакоя для прыёму ежы, забеспячэнне працуючых гарачымі абедамі, прафілактыка траўматызму, карыстанне паслугамі ўнітарнага прадпрыемства “Беларустурыст”, арганізацыя аздараўлення членаў калектыву і іх дзяцей, прыёмы грамадзян прававымі інспектарамі і прамыя лініі – падрабязны аналіз работы прафсаюзных камітэтаў на гэтыя і іншыя тэмы прагучаў у дакладзе старшыні раённага аб'яднання прафсаюзаў Расціслава Іванавіча Бразінскага.
МОВАЙ ЛІЧБАЎ
* У склад Астравецкага раённага аб'яднання прафсаюзаў уваходзяць 82 пярвічныя і 4 раённыя прафсаюзныя арганізацыі.
* У 2017 годзе створаны 3 новыя пярвічкі, у студзені 2018 года – 1.
* 8 арганізацый зарэгістраваны ў якасці юрыдычных асоб, у якіх не створаны пярвічныя прафсаюзныя арганізацыі.
* У 2017 годзе зарэгістравана 29 перазаключаных калектыўных дагавораў, у 66 унесены змены і дапаўненні, а таксама зарэгістравана 4 калектыўныя дагаворы ў зноў створаных пярвічных прафсаюзных арганізацыях.
Прадстаўнікі сярэдняй школы №1 Астраўца, КСУП “Гервяты” і цэнтральнай раённай бальніцы У.І.Барысевіч, Ю.А.Адула і В.І.Андралойць расказалі аб тым, як жывуць і адпачываюць іх пярвічныя арганізацыі.
На неабходнасць выканання Дэкрэту №1, барацьбы з шэрымі схемамі выплаты зарплат, выканання правілаў аховы працы і актывізацыі работы па аздараўленні і адпачынку членаў сваіх калектываў звярнуў увагу ўдзельнікаў савета Леанард Браніслававіч Багушэвіч.
План мерапрыемстваў на 2018 год быў прыняты прысутнымі без змяненняў і дапаўненняў.