Рэпарцёр высвятляў, якія газеты і часопісы выпісваюць астраўчане
На вуліцах горада карэспадэнт пацікавіўся ў астраўчан, якія газеты і часопічы яны выпісваюць і чаму.
Маргарыта Вішнеўская, пенсіянерка:
– Хіба яшчэ нехта нешта выпісвае? (Здзіўлена.) Жыву ў новым доме, і ні ў адной паштовай скрыні не бачыла ні газет, ні часопісаў. Пра гарадскія навіны даведваюся з пабліка ў сацыяльных сетках. Праўда, цётачка брата з’яўляецца пастаяннай падпісчыцай «Астравецкай праўды». Пры сустрэчы ці ў тэлефанаваннях яна мне паведамляе многае з таго, пра што пісала «раёнка».
Сямейная пара Янчэўскіх, пенсіянеры:
Уладзіслаў:
– Што прадаюць і купляюць, хто пайшоў з жыцця, які аб’ект адкрылі ў горадзе і што абмяркоўвалі на планёрцы ў старшыні райвыканкама – пра гэта і не толькі чытаем у «раёнцы».
Валянціна:
– Выпісваем толькі «Астравецкую праўду». Узрадавалася, што на старонках газеты адрадзіўся конкурс «Што б гэта значыла?». І сама ўдзельнічаю з задавальненнем, і газету чакаю з нецярпеннем, каб пачытаць чужыя допісы. Хацелася б, каб мяне не правілі, – я ж не паэт. На мой погляд, адрэдактаваны варыянт атрымліваецца менш смешным і цікавым, чым быў першапачаткова.
Ганна Нікіціна, спецыяліст па паштовай дзейнасці:
– У топе – «Астравецкая праўда». Шмат хто выпісвае «раёнку» – у асноўным гэта людзі сярэдняга і пажылога ўзросту. Таксама папулярныя «Друг пенсионера», «Я на пенсии», «Кудесница».
Я выпісваю дзіцячыя часопісы «Мамино солнышко» і «Мишуткины прописи».