Святы і памятныя даты 10-17 чэрвеня
10:47 / 13.06.2022
СЁЛЕТА СПАЎНЯЕЦЦА
125 гадоў (1897) з часу першага пісьмовага ўспаміну пра вёску Альхоўку.
30 гадоў (1992) з дня рэгістрацыі на Астравеччыне першай праваслаўнай абшчыны.
СЁЛЕТА АДЗНАЧАЕЦЦА
410 гадоў (1612) з дня нараджэння Цыпрыяна-Паўла Бжастоўскага, сына Яна Бжастоўскага, грамадскага і палітычнага дзеяча Вялікага княства Літоўскага. Быў адным з вядомых дыпламатаў ВКЛ, курыраваў перамовы з Маскоўскай дзяржавай падчас вайны 1654–1667 гадоў. Падпісваў у Андрусаве акт замірэння паміж Рэччу Паспалітай і Маскоўскай дзяржавай.
Фундатар будаўніцтва касцёла Святога Міхала арханёла ў Міхалішках.
115 гадоў (1907) з дня нараджэння Вітольда Іванавіча Марача.
Нарадзіўся 15 чэрвеня ў Пецярбурзе, куды, ратуючыся ад беззямелля, пераехалі яго бацькі. У 1919 годзе сям’я вярнулася ў вёску Куцькі Вілейскага раёна Мінскай вобласці. Вітольд працаваў парабкам, падзёншчыкам у заможных сялян. Вывучыўся на каваля. У 1937 годзе ўладкаваўся на кардонную фабрыку «Альхоўка». У 1939 годзе, калі пачалася Другая сусветная вайна, на фабрыцы было ўведзена самакіраванне, рабочыя абралі Вітольда Марача старшынёй рабочага камітэта.
Прайшоў вайну з 1941 па 1946 год, закончыў яе ў Японіі. Узнагароджаны ордэнам і сямю медалямі.
Пасля вайны ўзначальваў Свірскі аддзел сацыяльнага забеспячэння.
Двойчы (1939 і 1947 гады) выбіраўся дэпутатам Вярхоўнага Савета БССР.
СВЯТЫ И ПАМЯТНЫЯ ДАТЫ
12 чэрвеня
Дзень работнікаў лёгкай прамысловасці (прафесійнае свята)
Сусветны дзень барацьбы з дзіцячай працай
14 чэрвеня
Сусветны дзень донара крыві
Міжнародны дзень блогера
17 чэрвеня
Сусветны дзень барацьбы з апустыньваннем і засухай
Падрыхтавалі Ніна РЫБІК
і Рыта ДРЭМА .