Як атрымаць прыбытак з “рукава”, ведаюць у КСУП “Гервяты”
15:42 / 21.10.2021
Наш карэспандэнт наведаў гервяцкае сельскагаспадарчае прадпрыемства, каб адсачыць, які шлях робіць зерне кукурузы з поля да комплексу, і даведацца пра перавагі корму са спецыяльнага рукава.
КСУП «Гервяты» спецыялізуецца на вытворчасці ялавічыны. Больш таго, гэта адзіная на Астравеччыне гаспадарка, дзе ёсць комплекс па дарошчванні і адкорме буйной рагатай жывёлы. Каб зімой накарміць больш за 10 тысяч галоў, у тым ліку і малочных кароў, гервятцам трэба нарыхтаваць больш за 22 тысячы тон кармавых адзінак. Зазначу, што на ўмоўную галаву, яны ўжо назапасілі амаль 27 цэнтнераў кармавых адзінак (+0,2 да аналагічнага перыяду мінулага года). Дарэчы сказаць, план па нарыхтоўцы сенажу аграрыі КСУП «Гервяты» перавыканалі на 7% і заклалі ў тэхналагічныя ёмістасці для захоўвання кармоў звыш 36 400 тон зялёнай масы. Ужо з упэўненасцю можна казаць, што «гервятцы» з кармамі. У гаспадарцы працягваецца нарыхтоўка сіласу і закладка плюшчанага зерня кукурузы ў так званыя рукавы.
– Пад каралеву палёў сёлета адвялі каля 1 400 гектараў на сілас і 180 гектараў на зерне, – расказаў галоўны аграном КСУП «Гервяты» Аляксандр Кавалька. – У гэтым годзе кукуруза значна лепш урадзіла, чым летась. І надвор’е спрыяла, і да выбару насеннага матэрыялу падышлі адказна: спыніліся на гібрыдах першага пакалення «карынт» і «карданэ».
У праўдзівасці слоў галоўнага тэхнолага гервяцкіх палёў упэўнілася ўвачавідкі. Кукуруза апраўдала сваю мянушку: вымахала пад 3 метры і зверху ўніз ганарліва паглядае на чалавека, як сапраўдная каралева. Непадалёк ад вёскі Сакалойці на зерне яе ўбіраў адзін з вопытных механізатараў Іосіф Масевіч – неаднаразовы пераможца жніўных спаборніцтваў. З лета да позняй восені мужчына працуе на камбайне «Лексіён»: спачатку ўбірае збожжа, потым – кукурузу.
– Каб убраць гэтую культуру, для камбайна патрэбна спецыяльная жатка. Яе даўжыня складае 5,6 метраў, – уводзіць мяне ў курс спраў механізатар. – За дзень зжынаю каля 10 гектараў і намалочваю каля 120 тон зерня. А больш і не трэба – гэтага цалкам хапае для дзённай закладкі плюшчанай кукурузы ў рукавы.
У дзень майго прыезду машыны адвозілі жоўтае зерне з поля на малочна-таварны комплекс «Рымдзюны». Закладка спецыяльных рукавоў абываецца з дапамогай агрэгата для плюшчэння фінскай вытворчасці Murska. Па меры неабходнасці пагрузчык засыпае зерне ў магутны вальцавы млын для сплюшчвання. Неаспрэчны плюс гэтай машыны ў тым, што адначасова з «прэсаваннем» кукурузы можна выкарыстоўваць кансерванты. З дапамогай утвараемага ціску поліэтыленавы рукаў напаўняецца расціснутымі кукурузнымі зярнятамі.
– Гэта тэхналогія дазваляе ўбіраць кукурузу ў больш раннія тэрміны, калі колькасць спажыўных рэчываў максімальная, – патлумачыў Аляксандр Кавалька. – Цяпер у зерня вільготнасць каля 40%, а класці яго на захоўванне можна з вільготнасцю ў 12-14%. Зразумела, што яго давядзенне да патрэбнай кандыцыі вельмі энергазатратнае. Вялікі плюс новага метаду нарыхтоўкі кармоў у тым, што зерне можна сіласаваць прама з поля.
Выкарыстанне рукавоў – эканамічны і просты метад апрацоўкі і захоўвання зерня. Прастата абумоўлена тым, што здробненую кукурузу не трэба трамбаваць, больш таго, пагрузку зерня ў любы момант можна спыніць, а пазней працягнуць. Таксама не ўзнікае патрэбы ў спецыяльных сховішчах. Больш таго, памер рукава можна вар’іраваць у залежнасці ад колькасці зерня.
За работай плюшчылкі пільна сочыць Алег Юркойць, які кантралюе падачу кансерванта і ўзровень ціску ў сістэме.
– Полімерны рукаў паступова напаўняецца кукурузнай масай. Яго даўжыня ў сярэднім складае каля 60 метраў, дыяметр – 2 метры. Сіласуецца кукуруза каля трох тыдняў, – патлумачыў мужчына.
У планах гервятцаў закласці 10 рукавоў на тэрыторыі малочна-таварных комплексаў «Рымдзюны», «Дайлідкі» і комплексу па дарошчванні і ўтрыманні буйной рагатай жывёлы ў Гервятах.
Да слова, спецыялісты жывёлагадоўчай галіны сцвярджаюць, што вільготнае плюшчанае зерне кукурузы ў большай ступені адпавядае фізіялогіі жывёлы, асабліва буйной рагатай, у адрозненне ад сухога. Прыгатаваны такім спосабам корм перакрывае надахоп энергіі і павышае прадукцыйнасць рагуль.
Паказальна, што многія беларускія гаспадаркі, якія ўкаранілі падобную тэхналогію, адзначаюць не толькі павышэнне прадукцыйнасці жывёлы, але і станоўчы эканамічны эфект за кошт значнай эканоміі сродкаў на сушцы і дапрацоўцы зерня. Верыцца, што і ў КСУП «Гервяты» рукавы для захоўвання сплюшчанай масы стануць «каралеўскімі».
Подписывайтесь на «Островецкую правду» в телеграм по короткой ссылке https://t.me/ostrovetsby.
И присоединяйтесь к нашему сообществу в viber https://vk.cc/c3yHGs – будьте всегда в курсе свежих новостей из жизни Островца и Островецкого района.
Подписывайтесь на телеграм-канал «Гродно Медиа Group» по короткой ссылке t.me/GrodnoMediaGroup.
Телеграм-канал «Гродно Медиа Group» – это ежедневные новости районов Гродненской области и города Гродно.
