У Астравец едзе “Вар’ятка”
Рэспубліканскі тэатр беларускай драматургіі 7 кастрычніка ў 19.00 на сцэне шматфункцыянальнага культурнага комплексу пакажа адзін з лепшых сваіх спектакляў – трагіфарс “Вар’ятка”.
…Яна – старэючая адзінокая жанчына, якая не знайшла шчасця ў асабістым жыцці, блізкая да адчаю, бо гады праходзяць, а яна адна. Хоць бы хто, родны, блізкі, дарагі, быў побач!
Ён – самаўпэўнены і самаўлюбёны хлышч, які не ведае слова “не”, прывык не заўважаць навакольных, не бачыць у чалавеку асобу, можа любую прыгажуню спакусіць за 15 хвілін.
Паміж імі няма нічога агульнага. Але менавіта да яго яна прыходзіць з просьбай. Невялікая паслуга – так, дробязь… Яна заплаціць…
Яна вар’ятка? Ён нягоднік?
Не спяшайцеся рабіць высновы – магчыма, яны зменяцца, калі вы паглядзіце спектакль.
Бо ўсе мы хоць аднойчы ў жыцці былі вар’ятамі… Ці нягоднікамі… І ніхто не ведае, што хаваецца за нашай паўсядзённай маскай. Якую хоць аднойчы хочацца (трэба?!) скінуць кожнаму.
Калі вы прыхільнік сур’ёзнай драматургіі, гэты спектакль вас не расчаруе.