Як праходзіць корманарыхтоўка ў саўгасе “Падольскі”

07:49 / 23.06.2021

Што кармы – фундамент усёй эканомікі сельскагаспадарчага прадпрыемства, а значыць і дабрабыту працаўнікоў, добра ведаюць аграрыі РУП «Астравецкі саўгас «Падольскі». Пэўны час гэтая гаспадарка была ў аўтсайдарах, а цягам апошніх некалькіх гадоў займае трэцюю пазіцыю ў раёне, прычым як у раслінаводстве, так і ў жывёлагадоўлі.
Як думаюць саўгасаўцы ўтрымаць планку, колькі і якіх кармоў плануюць нарыхтаваць – пра гэта і не толькі даведаўся карэспандэнт, пабыўшы на першым укосе ў Падольцах.

ЛІЧБА
На 20 чэрвеня першым укосам нарыхтавана 6 625 (41%) сенажу. Травы ляглі ў пракосы на 1 345 гектарах (80% ад запланаванага).

– Некалькі гадоў запар у нашай гаспадарцы не хапала травяністых кармоў пад патрэбу. Таму пазалетась прыклалі максімум намаганняў і зрабілі ўпор на нарыхтоўку ўласных запасаў. Вынік не прымусіў сябе чакаць, – патлумачыў намеснік дырэктара РУП «Астравецкі саўгас «Падольскі» па вытворчасці Андрэй Скурат. – Травы нядрэнныя, думаю, сёлета таксама нарыхтуем патрэбную для зімоўкі буйной рагатай жывёлы колькасць кармоў. Прычым каля 60-70% – першым укосам.

Траву возяць Іван Аўгуль і Дзмітрый Родзь

Каб у зімне-стойлавы перыяд для рагуль было дастаткова корму, у РУП «Астравецкі саўгас «Падольскі» плануюць назапасіць 11 541 тону кармавых адзінак. З травяністых – 16 тысяч тон сенажу, у тым ліку закруціць тысячу тон травы ў стрэйч-плёнку, 24 тысячы тон сіласу і 710 тон сена.
– На днях плануем выпусціць у поле другую касілку, – працягвае Андрэй Скурат. – Зялёную масу возяць 3 трактары і 5 МАЗаў – уласныя і з Ашмянскай сельгастэхнікі. Траву ў траншэі закладваем з выкарыстаннем кансерванта «Лабаксіл» – рэчыва разводзім вадой: звычайна 300 тон хапае на ўвесь дзень.

Намеснік дырэктара па вытворчасці Андрэй Скурат

Дарэчы сказаць, у саўгасе найменшая сярод гаспадарак плошча сенакосу – 1 685 гектараў. У дзень майго прыезду першы ўкос тут пераваліў за экватар.

Касец Валерый Жэгарыс

Валерый Жэгарыс, як і яго бацька Іосіф Станіслававіч, механізатарскую справу добра ведае, больш таго – любіць. Каб зразумець гэта, варта толькі глянуць на яго трактар «Беларус-3022», які між сабой механізатары называюць «трыццаткай». Тэхніка дагледжаная, акуратаная, на кабіне бачны вясёленькі надпіс аўтарства механізатара: «Белорусская тридцатка, будет мне и ей несладко», а таксама карта Беларусі колерам нацыянальнага сцяга з назвай гаспадаркі. У дзень майго візіту Валерый Жэгарыс адзін клаў травы ў пракосы – сёлета мужчыне даверылі новую модульную ратацыйную касілку КМР-9.
– Неаспрэчныя плюсы гэтай тэхнікі ў тым, што травы з дзевяці метраў адразу кладуцца ў адзін валок. Правяліцца «зялёнка» – і можна кормаўборачныя комплексы пускаць у поле, – гаворыць касец. – Аб’ём работ залежыць ад многіх фактараў: контурнасці ўчастка, надвор’я і іншых. За дзень у сярэднім скошваю травы на 60 гектарах.
Для павелічэння тэмпаў нарыхтоўкі кармоў летась у гаспадарцы набылі высокапрадукцыйны кормаўборачны камбайн айчыннай вытворчасці, на якім другі сезон працуе Мікалай Капуста.

Камбайнер Мікалай Капуста

– За дзень у сярэднім «набіваю» пад 400 тон, бывае, і больш, – гаворыць механізатар.
На другім кормаўборачным камбайне «Ягуар» не першы год працуе Аляксандр Шостак. Па словах мужчыны, на корманарыхтоўцы, як і падчас любой сельскагаспадарчай кампаніі, самае галоўнае – каб не падводзіла тэхніка.

На «Ягуары» працуе Аляксандр Шостак

– На гэтым «Ягуары» трэці сезон, – расказвае Аляксандр Шостак. – Камбайн, якому ўжо пад 20 гадоў, некалі перакупілі ў адной з гродзенскіх гаспадарак. Здараюцца паломкі: нядаўна, напрыклад, падшыпнікі пасыпаліся. Але ўсе праблемы своечасова вырашаюцца.
З поля каля вёскі Дуды, дзе кормаўборачныя камбайны падбіралі і здрабнялі траву, машыны адна за адной імчалі ў Падольцы, дзе побач з малочна-таварным комплексам закладвалі сянажную масу.

Трамбоўкай травы займаюцца Віктар Мундуць і Віктар Грыгаровіч

Не першы год «зялёнку» трамбуюць Віктар Грыгаровіч і Віктар Мундуць, чый партрэт некалькі гадоў назад быў занесены на раённую Дошку гонару.
За працэсам сочаць агранамічная і ветэрынарная службы: пастаянна вымяраюцца вільготнасць і тэмпература масы.
– Раней трамбавалі кругласутачна. Цяпер, згодна з тэхналагічным рэгламентам нарыхтоўкі травяністых кармоў, гэтага не робім: трава «ўкатваецца» яшчэ цягам трох гадзін пасля апошняга рэйсу. На ноч усё закрываецца плёнкай. Адну траншэю трамбуем каля 3-4 дзён, – патлумачыў загадчык раслінаводчага ўчастка Уладзімір Шэша. – У нас добры склад травасумесі: і цімафееўка, і люцэрна, і іншыя – думаю, будзем з кармамі…

Загадчык раслінаводчага ўчастка Уладзімір Шэша

Подписывайтесь на телеграм-канал «Островецкая правда» по короткой ссылке https://t.me/ostrovetsby.

Телеграм-канал «Островецкая правда» – всё самое интересное из жизни Островца и Островецкого района.

Подписывайтесь на телеграм-канал «Гродно Медиа Group» по короткой ссылке t.me/GrodnoMediaGroup.

Телеграм-канал «Гродно Медиа Group» – это ежедневные новости районов Гродненской области и города Гродно.