Камбайн, пагрузчык, метад “распылу” – што новага на корманарыхтоўцы ў КСУП “Гервяты”

12:09 / 15.06.2021

Раней эпагеем сельскагаспадарчага года лічылася жніво. У апошнія дзесяцігоддзі бадай што самы галоўны і адказны перыяд – корманарыхтоўка, бо жывёлагадоўля прыносіць да 70% выручкі. Ад таго, як спрацуюць летам корманарыхтоўшчыкі, будзе залежаць, што ў калгаснай кішэні: пуста ці густа.

Намеснік дырэктара КСУП «Гервяты» па вытворчасці Станіслаў Івашка

На мінулым тыдні наш карэспандэнт даведаўся, колькі і якіх кармоў плануюць назапасіць у КСУП «Гервяты».
Гэта адзінае ў раёне сельскагаспадарчае прадпрыемства, якое спецыялізуецца на вытворчасці ялавічыны. З улікам дойнага статку тут больш, чым у іншых гаспадарках, буйной рагатай жывёлы – амаль 10 тысяч галоў, з якіх крыху больш за 40% утрымліваюцца на комплексе па дарошчванні і адкорме.

ЛІЧБА:
3 173 гектара  складае першы ўкос  у КСУП «Гервяты».
На 13 чэрвеня травы ляглі  ў пракосы на 1 860 гектарах  (59% ад плана).
Нарыхтавана 10 324 тоны  сенажу (30%) і 36 тон   травяністых кармоў  у стрэйч-плёнцы (24%).

Каб зімой пракарміць такое вялікае пагалоўе, «гервятцы» плануюць нарыхтаваць амаль 22,5 тысячы тон кармавых адзінак. З травяністых кармоў – 34 тысячы тоны сенажу, прычым 60% закласці травамі першага ўкосу, амаль 45 тысяч тон сіласу і 750 тон сена. Забягаючы наперад адзначу, што ўсе перадспасылкі для ажыццяўлення гэтых планаў у аграрыяў гэтай гаспадаркі ёсць, галоўнае – не падвяло б надвор’е…
– Прасцей за ўсё недапрацоўкі спісаць на дрэннае надвор’е, – лічыць намеснік дырэктара па вытворчасці Станіслаў Івашка. – У гэтым сэнсе ўсе гаспадаркі раёна знаходзяцца ў аднолькавых кліматычных умовах. Паспяховасць корманарыхтоўчай кампаніі залежыць ад многіх фактараў: тэхнічнай аснашчанасці, прытрымлівання тэхналагічнага рэгламенту нарыхтоўкі кармоў і тэрмінаў уборкі, якасці травастою, урэшце – саміх механізатараў.

Вадзіцелі Анджэй Ясевіч і Віктар Герасім

У дзень майго прыезду дождж усё ж унёс карэктывы ў планы корманарыхтоўшчыкаў – і тэхніка рушыла ў поле толькі пасля абеду. Механізатары чакалі, пакуль вецер і сонейка прыбяруць з валкоў лішнюю вільгаць. Па рэгламенце вільготнасць травы не павінна быць большай за 60-65%.
На 9 чэрвеня ў КСУП «Гервяты» заклалі бетаніраваныя кормасховішчы ў Чэхах, Дайлідках, Гайголях і Гервятах. Прадугледжаныя нормы – тэхналагічную ёмістасць для захоўвання кармоў трэба закласці за 3-4 дні – гервятцы абыходзяць і спраўляюцца з гэтым за 2-2,5 дні.
У траншэях аб’ёмам у тысячу тон «зялёнку» трамбуюць дзве адзінкі тэхнікі, у больш вялікіх – тры. Шмат гадоў гэтым займаецца Віктар Гродзь, якога неаднойчы прафсаюз аграрыяў прызнаваў лепшым на пагрузцы арганікі. Сёлета мужчына трамбуе траву на новенькім пагрузчыку «Амкадор-352».
– У гаспадарцы цэлы год чакалі гэты пагрузчык. Чаму даверылі мне? – мужчына задумваецца. – Напэўна, вопыту ў мяне шмат. Неаспрэчныя плюсы машыны: прастата абслугоўвання, умераны расход паліва і трамбуе добра.

Фёдар і Андрэй Махонькі возяць «зялёнку»

Дарэчы сказаць, сёлета змянілі рэгламент нарыхтоўкі травяністых кармоў: калі раней «зялёнку» трамбавалі кругласутачна, то цяпер пасля асноўнай закладкі траву «ўкатваюць» яшчэ 3 гадзіны – да 22.00 і ўкрываюць на ноч вакуумнай плёнкай. Па словах спецыялістаў, масу вільготнасцю 55% трэба трамбаваць больш інтэнсіўна, аптымальны паказчык – 60%.
Для нарыхтоўкі сенажу ў КСУП «Гервяты» абавязкова выкарыстоўваюць кансерванты. Летась прымянялі прэпарат «Бонсілаге». Сёлета спыніліся на яго аналазе – кансерванце «Бэстсіл».
– Па ўласцівасцях гэтыя прэпараты вельмі падобныя, адрозніваюцца толькі цаной. Выбралі таннейшы, – растлумачыў Станіслаў Івашка. – У сучасных рэаліях выкарыстанне кансервантаў нават і не абмяркоўваецца – гэта неабходнасць. У любым выпадку выхад спажыўных рэчываў атрымліваецца значна большым.
На першым укосе ў КСУП «Гервяты» задзейнічана больш за 20 адзінак тэхнікі, на якой працуюць вопытныя механізатары. У залежнасці ад фронту работ касілкі, комплексы, аўтамабілі і трактары звычайна дзеляць на 2 звяны. На касавіцы сёлета працуюць 2 новыя кормаўборачныя комплексы: 1 айчыннай вытворчасці КВК-800 і нямецкай – «КронэБіг-Х», 11-метровая варушылка.

Касец Віктар Кардзіс

– Магутнасцей на корманарыхтоўцы ў нас хапае, тым больш грунтоўна абнавілі тэхнапарк. Летась, напрыклад, набылі кормаўборачны камбайн «Ягуар», варушылку. Тэхнічна і маральна састарэлы «Ягуар» выставілі на продаж, а кормаўборачны камбайн «Палессе» перадалі сельгастэхніцы, – тлумачыць Станіслаў Івашка. – Агульнымі намаганнямі трох магутных касілак скошваецца больш за 150 гектараў.
«Гервятцы» могуць пахваліцца не толькі новай тэхнікай, але і новым падыходам у нарыхтоўцы кармоў.
– Пры нарыхтоўцы бабовых і люцэрны, якія лічацца дрэнна сіласуемымі, сёлета ўпершыню выкарысталі метад скошвання не ў валок, а ў распыл. Вопыт перанялі ў перадавых гаспадарак Гродзенскай вобласці: СВК «Верцялішкі», вытворчага кааператыва імя В.І. Крэмко, – працягвае намеснік дырэктара. – Пры такой тэхналогіі на змену касілкам заступаюць варушылкі, якія дадаткова плюшчаць зялёную масу. Пры добрым сонечным надвор’і дастаткова сутак для правяльвання траў, раней даводзілася чакаць 2-3 дні – летась увогуле была цэлая праблема з канюшынай, люцэрнай. Гэты спосаб нарыхтоўкі, па-першае, значна эканоміць час, па-другое, зялёная маса закладваецца з нармальнай вільготнасцю. Аднак ёсць і мінусы: пры зграбанні здробненай масы трапляюць часцінкі глебы, камяні, што шкодзіць корманарыхтоўчым комплексам: хутчэй зношваюцца нажы, супрацьрэжучыя пласціны і іншае. Таксама гэта стымулюе працэс ўтварэння маслянай кіслаты, але якасная трамбоўка, аптымальныя тэрміны закладкі траншэі, яе правільнае ўкрыццё, выкарыстанне таго ж кансерванта – здымаюць праблему.
Найлепшым часам для нарыхтоўкі сенажу з бабовых культур лічыцца фаза бутанізацыі да пачатку цвіцення – «гервятцы» з лішкам укладваюцца ў аптымальныя тэрміны.

Новы «Амкадор» даверылі Віктару Гродзю

На новым высокапрадукцыйным кормаўборачным камбайне «КронэБіг-Х» траву падымае і здрабняе Сяргей Філімоненка.
– Плюс машыны ў тым, што, у залежнасці ад ураджайнасці травы, можна працаваць у двух рэжымах: эканомным і больш магутным, – тлумачыць камбайнер. – Трава здрабняецца на патрэбную даўжыню, а падборшчык рэгулюе хуткасць яе падачы.

За пажарнай бяспекай у полі сочыць Раман Масевіч

Сваёй чаргі чакаюць машыны і трактары. Не першы год «зялёнку» на «Джон-Дзіры» возіць лепшы араты раёна, чый партрэт некалькі гадоў назад быў занесены на раённую Дошку гонару, Анджэй Ясевіч. Ад калегі не адстаюць і бацька з сынам Фёдар і Андрэй Махонькі – пераможцы леташняга працоўнага спаборніцтва, якое праводзіў райкам прафсаюза работнікаў аграпрамысловага комплексу сярод занятых на вясенне-палявых работах механізатараў, і многія іншыя працаўнікі.

На новым комплексе працуе Сяргей Філімоненка

…Кажуць, што паспяховасць малочнай вытворчасці залежыць ад трох «К»: кароў, кармоў і кадраў. Пабываўшы на касавіцы ў КСУП «Гервяты», вывела формулу паспяховай корманарыхтоўкі – яна залежыць ад трох «Т»: траў, тэхнікі і тэхналогіі – яны ў гаспадарцы проста выдатныя.

Подписывайтесь на телеграм-канал «Островецкая правда» по короткой ссылке https://t.me/ostrovetsby.

Телеграм-канал «Островецкая правда» – всё самое интересное из жизни Островца и Островецкого района.

Подписывайтесь на телеграм-канал «Гродно Медиа Group» по короткой ссылке t.me/GrodnoMediaGroup.

Телеграм-канал «Гродно Медиа Group» – это ежедневные новости районов Гродненской области и города Гродно.