Зазірнём у гісторыю і пачытаем, пра што пісала «раёнка» ў юбілейныя для сябе гады
16:07 / 22.05.2021
22 мая 1971 года
Чый гадзіннік?
Сёння падобныя інфармацыі часцей можна сустрэць у сацыяльных сетках. Хаця яшчэ гадоў 5 назад аб’явы ў газеце аб знаходжанні ці пошуку рэчаў былі нярэдкімі.
На апошняй старонцы газеты за 1971 год змешчана падобная публікацыя А.Ф. Кардзіса: «Ідучы па дарозе Рымдзюны – Солы, я знайшоў мужчынскі наручны гадзіннік. Чый ён, невядома. Знаходка ляжыць у мяне дома і чакае ўладальніка. Звяртацца па адрасе: вёска Рымдзюны».
21 мая 1981 года
І шафёры, і трактарысты, і кулінары
Усё большую папулярнасць сярод вучняў сярэдніх школ набываў Варнянскі вучэбна-вытворчы камбінат.
Для дзяцей тут створаны ўсе ўмовы, каб набыць прафесію. У кожным кабінеце ёсць неабходнае абсталяванне, падручнікі, плакаты, іншыя дапаможныя сродкі. Працуюць інтэрнат, пакой адпачынку, сталовая.
Ёсць тут трактары і аўтамабілі, сельскагаспадарчыя машыны, прычапныя прылады, абсталяванне малочна-таварных ферм, цэхі кройкі і шыцця.
У камбінаце займаецца 514 чалавек па сямі спецыяльнасцях: створаны групы шафёраў, трактарыстаў, аператараў машыннага даення, малодшых лесаводаў, кулінараў, спецыялістаў па прамысловым і прадуктовым таваразнаўстве, апрацоўцы тканін.
22 мая 1991 года
Дапамога калгаснікам
Калгас імя Калініна паспяхова завяршыў пасадку бульбы.
Больш за палову работ выканаў перадавы механізатар гаспадаркі Мар’ян Іосіфавіч Захарэўскі. За няпоўныя 2 тыдні ён пасадзіў клубні на плошчы звыш 100 гектараў, а потым дапамагаў калгаснікам на іх прыватных участках.
23 мая 2001 года
Настаўнікі экзамен вытрымалі
Упершыню за 20 гадоў прайшоў агляд мастацкай самадзейнасці настаўніцкіх калектываў раёна. Удзельнічала 8 школ.
Настаўнікі спявалі, танцавалі, чыталі вершы і ставілі сцэнкі.
«Гледачам спадабаліся выступленні калектываў Гервяцкай, Альхоўскай і Міхалішкаўскай сярэдніх школ, добра выступілі і гаспадары – Рымдзюнскія школы з беларускай і літоўскай мовамі навучання. Пераможцаў будзе вызначаць прафесійнае журы на чале з загадчыкам раённага аддзела культуры Данутай Чарнушэвіч. Але ўжо можна сказаць, што творчы экзамен настаўнікі здалі на «выдатна», – пісала газета.
21 мая 2011 года
Час кляшчоў
Надышла цёплая пара, а з ёй і галоўная бяда – кляшчы.
Як толькі зямля праграецца да пяці градусаў, кляшчы выходзяць «на паляванне». Гэты ж час прыпадае на пікнікі, шашлыкі і пасадку агародаў.
«На любой травінцы ці галінцы нас можа чакаць гатовы да атакі клешч. І справу сваю ён ведае добра – можа вывесці чалавека «са строю» на тыдзень-два, а то і на ўсё жыццё,» – сцвярджае аўтар артыкула.
Подписывайтесь на телеграм-канал «Островецкая правда» по короткой ссылке https://t.me/ostrovetsby.
Телеграм-канал «Островецкая правда» – всё самое интересное из жизни Островца и Островецкого района.
Подписывайтесь на телеграм-канал «Гродно Медиа Group» по короткой ссылке t.me/GrodnoMediaGroup.
Телеграм-канал «Гродно Медиа Group» – это ежедневные новости районов Гродненской области и города Гродно.