«Пазнай Астравеччыну»: 11 этап

09:04 / 03.04.2020

Пасля таго як актыўныя ўдзельнікі конкурсу «Пазнай Астравеччыну» «з лёту» «разгрызалі» першыя заданні, мы вырашылі прапанаваць ім нешта, на наш погляд, больш складанае. Так, драўляная скульптура анёла на магіле Міхала Валуевіча ў Спондах віднеецца з дарогі, «Астравецкая праўда» неаднойчы пісала пра народнага майстра, а тэлекампанія АНТ нават зняла фільм пра таленавітага разьбяра. І ўсё ж гэты патэнцыяльны турыстычны аб’ект не вельмі вядомы шырокаму колу нават тых, хто цікавіцца гісторыяй бацькаўшчыны, – зрэшты, як і многія іншыя цікавосткі астравецкага краю.

І як жа радасна было памыліцца: аказваецца, ведаюць нашы канкурсанты і пра самога Міхала Валуевіча, і пра скульптуру на яго магіле. А хто не ведаў, той, дзякуючы конкурсу, пастараўся даведацца – і гэта яшчэ больш прыемна!

Фота Алега Драгана

Лёс Міхала Валуевіча – дзеда Міхалкі, як яго звалі часцей за ўсё, – які жыў у Глушыцы, што каля Спондаў, вартае таго, каб пра яго здымалі кіно і ўстанаўлівалі яму помнікі. Гэты цікавы неардынарны чалавек пражыў 93 гады, быў удзельнікам Першай сусветнай вайны. Уцёкшы з аўстрыйскага палону, пяць гадоў пехатой дабіраўся дахаты. Многа і цяжка працаваў, зведаў голад і галечу, насмешкі землякоў. Іншыя касілі і аралі, а ён выразаў з дрэва скульптуры. Яго работы дэманстраваліся на ВДНГ у Маскве, упрыгожылі экспазіцыі Маладзечанскага краязнаўчага музея і Гродзенскага абласнога музея гісторыі рэлігіі, многія дамы і касцёлы – а ён да старасці жыў у хацінцы з глінабітнай падлогай, дзе стаялі толькі ложак, стол, зроблены яго рукамі хатні драўляны алтар, і ляжалі прылады працы.

Віцебскі мастак Юрый Чапскі так пранікся лёсам і творчасцю народнага разьбяра Міхала Валуевіча, што зрабіў скульптуру драўлянага анёла ў рост чалавека, якая была ўстаноўлена на магіле нашага земляка, дзякуючы дапамозе мясцовых краязнаўцаў.

Першымі правільныя адказы на пытанне конкурсу далі жыхар Спондаў Іван Салавей, якому налічаны адзін бал, і родзічка дзеда Міхалкі з Кямелішак Галіна Салавей – яна падрабязна расказала пра народнага разьбяра і дапоўніла расповед цікавымі фотаздымкамі з сямейнага архіва, за што і атрымала тры балы.

Далей пасыпаліся адказы пастаянных удзельнікаў. Адзін бал атрымаў Сяргей Жукоўскі, па два – Ганна Мілашэвіч і Ванда Вайшнаровіч, па тры – Святлана Марозава, Алег Драган, Марына Кімса, Вікторыя Іванцэвіч і Алена Памецька.

Пасля дзесяці тураў па-ранейшаму лідзіруе Марына Кімса – у яе 29 балаў, на тры ачкі адсталі ад яе Алег Драган і Алена Памецька.

Наступнае заданне, як нам здаецца, не павінна выклікаць асаблівых цяжкасцей ні ў пастаянных, ні ў новых канкурсантаў.
Чакаем вашых адказаў з каментарыямі і фотаздымкамі!

Дзе гэта, што гэта?

Фота Алеся Юркойця

Нагадваем: далучыцца да конкурсу можна з любога этапу. Калі вы ведаеце, дзе гэта і што гэта, – дасылайце свае адказы, расповеды і фотаздымкі.

Адказы на пытанні конкурсу можна дасылаць у рэдакцыю па электроннай пошце ці паведамляць па тэлефоне 2-03-64 на працягу пяці дзён (з улікам выхадных і святочных) пасля выхаду газеты з конкурсным заданнем (да аўторка ўключна).