Чым запомнілася астраўчанам студэнцтва
14:01 / 25.01.2020
Астраўчан і гасцей горада наш карэспандэнт папрасіў расказаць, кім яны марылі стаць і кім працуюць цяпер, а таксама прыгадаць самы запамінальны выпадак са студэнцтва.
Андрэй Юркойць, намеснік дырэктара будбазы «Малі»:
– З дзяцінства марыў быць старшынёй калгаса. (Усміхаецца.) Бацька быў брыгадзірам і часта браў мяне ў поле. У старэйшых класах мэтанакіравана пачаў рыхтавацца да паступлення. Зразумела, што ва ўніверсітэце не вучылі быць старшынёй, затое можна было атрымаць спецыяльнасці агранома, ветэрынара ці заатэхніка. Зямля і расліны мне заўсёды падабаліся – і я паступіў на агранамічны факультэт Горыцкай сельскагаспадарчай акадэміі.
Студэнцтва – залатая пара! Як кажуць, ёсць што ўспомніць, але няма чаго дзецям расказаць. (Усміхаецца.) У сельскай гаспадарцы не працую – мая работа звязана з будаўніцтвам.
Яніна Ляховіч, пенсіянерка:
– У наш час сярод дзяўчынак самымі папулярнымі прафесіямі былі бухгалтар і настаўнік. З першай спробы ў мяне не атрымалася паступіць у інстытут. Каб не губляць часу, пайшла працаваць у райспажыўтаварыства. Потым завочна адвучылася ў Маладзечненскім гандлёва-планавым тэхнікуме. Ніколі не спісвала, па начах вучыла білеты ў інтэрнаце, але на сесіі знаходзіла час схадзіць з сяброўкамі ў кафэ ці кіно.
Кацярына Сакалоўская, у адпачынку па доглядзе дзіцяці:
– Па натуры я творчы чалавек. Пасля школы паступіла ў Беларускі нацыянальны тэхнічы ўніверсітэт на прыборабудаўнічы факультэт. Выбрала спецыялізацыю «ювелірная справа». Верыла, што будзе вельмі цікава, але праз некалькі гадоў вучобы поўнасцю расчаравалася – мы ў тэорыі вывучалі структуру машын і абсталявання, якія выкарыстоўваюцца ў ювелірнай справе.
Самая запамінальная падзея студэнцкіх гадоў – сустрэча з будучым мужам, які таксама вучыўся ў БНТУ, але на энергетычным факультэце.
Пакуль галоўны мой занятак – быць мамай. (Усміхаецца.) Але мару паспрабаваць свае сілы ў тату-індустрыі. Нягледзячы на тое, хто і якую спецыяльнасць атрымаў, жыццё можа змяніцца кардынальна ў адзін момант.
Подписывайтесь на телеграм-канал «Гродно Медиа Group» по короткой ссылке t.me/GrodnoMediaGroup.
Телеграм-канал «Гродно Медиа Group» – это ежедневные новости районов Гродненской области и города Гродно.
