З вялікім і радасным святам Нараджэння Пана і Збаўцы нашага Езуса Хрыста!
07:04 / 25.12.2019
Дарагія браты і сёстры, веруючыя і ўсе людзі добрай волі!
Шчыра віншую з вялікім і радасным святам Нараджэння Пана і Збаўцы нашага Езуса Хрыста!
«Хвала на вышынях Богу, а на зямлі спакой людзям добрай волі!» Гэта анёльскае прывітанне абвесціла гораду Давіда Нараджэнне Хрыста ў святую ноч. Праз стагоддзі гэта падзея працягвае напаўняць нашы сэрцы радасцю, надзеяй на міласэрнасць і любоўю Усемагутнага Бога.
У Евангеллі ад Яна ёсць цудоўныя словы: слова сталася целам і пасялілася між намі, і ўбачылі мы славу Ягоную, славу, якую мае ад Айца Адзінародны, поўны ласкі і праўды.
Для нашага збавення ў гэты свет прыйшло маленькае дзіцятка – Езус, каб праз крыж абвесціць збавенне, а праз з мёртвых паўстанне – адкрытасць Божага дому людзям.
Няхай Дзіцятка Езус адорыць вас і вашы сем’і спакоем, добрым здароўем і жывой верай. Радасных святаў, шчасця, дабрабыту і поспехаў у надыходзячым Новым годзе!
Ксёндз-канонік Юзаф БАГДЗЕВІЧ,
Астравецкі дэкан
