Якія месцы ў Астраўцы па душы яго жыхарам
09:17 / 29.04.2019
Алена Кірылава, Беларуская АЭС:
– На Астравеччыну мы пераехалі тры гады назад з Віцебскай вобласці. Астравец – чысты, утульны, кампактны горад – і нам тут вельмі падабаецца жыць. Не крывячы душой, скажу, што такіх чулых, спагадлівых людзей, як тут, больш нідзе не сустракала. Люблю вечаровыя шпацыры па цэнтральнай частцы горада. Таксама мне падбаецца бываць на востраве кахання.
Віктар Гаспаровіч, ДЛГУ «Астравецкі лясгас», з сынам Мікалаем:
Віктар:
– Хоць і жывём мы ў прыватным сектары Астраўца, але больш любім бываць на прыродзе, чым у горадзе. Відаць, прафесійны адбітак (Усміхаецца). А калі сур’ёзна, лічу, што Астравец за апошнія гады вельмі папрыгажэў: гэта тычыцца не толькі новых мікрараёнаў, але і цэнтральнай часткі горада.
Мікалай:
– А мне ўсё падабаецца! Наш Астравец – самы прыгожы горад у Беларусі!
Сцяпан Мельнік, пенсіянер:
– Гадоў дваццаць, нават дзесяць, назад ніхто не мог нават падумаць, што Астравец з правінцыйнага гарадскога пасёлка ператворыцца ў малады горад, які імкліва развіваецца. Цяжка сказаць, якое месца найбольш любімае, – я люблю Астравец увесь. Мне падабаецца бываць на вадасховішчы ў мікрараёне №2 – там я адпачываю душой. Нездарма ж кажуць, што вечна можна глядзець на працуючага чалавека, агонь і ваду.
Вольга Баркоўская, магазін «Кулінарыя»:
– У Астраўцы мне найбольш да душы зялёныя зоны: люблю прагуляцца ў лесапарку, падабаецца сквер у цэнтры горада. Там адпачываеш душой ад штодзённых клопатаў і набіраешся сіл на новы дзень. Таксама люблю востраў кахання – вельмі ж гэта рамантычнае месца!
Соф’я Гродзь, СШ № 2:
– Найбольш мне падабаецца хадзіць у кафэшкі і магазіны – балазе, іх цяпер у Астраўцы столькі-і-і!
А якое месца Астраўца найбольш дарагое вашаму сэрцу? Падзяліцеся з намі сваімі думкамі ў суполках «раёнкі» ў сацыяльных сетках.
