Навошта па полі рассейваць муку?
14:09 / 01.04.2019
На перадавой вясенне-палявых, жніўных і ўборачных работ звычайна знаходзяцца сейбіты, аратыя, камбайнеры, корманарыхтоўшчыкі: пра іх піша наша газета, райкам прафсаюза работнікаў аграпрамсловага комлекса штогод аб’яўляе спаборніцтвы і ўзнагароджвае пераможцаў… Але не менш плённа працуе і так званы другі фронт – тыя, хто дапамагае вяскоўцам падчас напружаных сельскагаспадарчых кампаній.
– Наша прадпрыемства дапамагала рыхтаваць гаспадаркам раёна тэхніку да вясенне-палявых работ. Балазе, створанае на Астравеччыне два гады назад унітарнае прадпрыемства «Астравецкі райагразаб» займаецца пошукам і набыццём якасных і недарагіх камплектуючых і запчастак, – расказвае інжынер Астравецкай сельгастэхнікі Анатоль Блажэвіч. – Цяпер тэхніка і людзі працуюць на вапнаванні глебы, унясенні арганікі, рамонце корманарыхтоўчай тэхнікі. Але давайце лепш паглядзім.
Мы накіроўваемся на базу матэрыяльна-тэхнічнага забеспячэння – сюды па чыгунцы паступаюць мінеральныя ўгнаенні.
– На складах цяпер захоўваецца каля тысячы тон угнаенняў, а ўвогуле складскія памяшканні разлічаны на захоўванне 3,5 тысячы, – па дарозе расказвае Анатоль Генрыхавіч. – Акрамя гэтага, ёсць тры ёмістасці для захоўвання вадкага азоту аб’ёмам 1,2 тысячы тон і тры рэзервуары аб’ёмам 2 тысячы тон кожны.
На базе ў Гудагаі тры трактары загружаліся даламітавай мукой. У дзень майго візіту яе планавалася ўносіць на палях КСУП «Гервяты».
5 431 тона мінеральных угнаенняў паступіла на базу Астравецкай сельгастэхнікі.
ДАВЕДКА
Даламітавая мука выкарыстоўваецца для паніжэння кіслотнасці глебы. Спецыялісты Гроднааблхімізацыі раз на некалькі гадоў праводзяць даследванне
глебы на ўтрыманне фосфару, калія, гумусу – на аснове гэтага аналізу ствараюцца спецыяльныя картаграмы, дзе ўчасткі зямлі разбітыя на сектары і пазначаныя рознымі колерамі.
Чырвоны, напрыклад, сведчыць пра празмерную кіслотнасць глебы.
Брыгада па ўнясенні даламітавай мукі
Яўген Асадчук:
– Пачынаў я ў Варнянах у сельгасхіміі – ад яе, на жаль, назва толькі засталася. Пасля далучэння нашай арганізацыі да сельгастэхнікі стаў працаваць тут. Дозу ўнясення даламіту вызначае аграном, наша справа – выканаць заданне. За дзень робім некалькі рэйсаў – у залежнасці ад таго, у якой гаспадарцы працуем. Калі ў Слабодцы вапнавалі глебу, то да пяці разоў прыязджалі на базу загружацца. У бункер змяшчаецца 9 тон даламітавай мукі, якой у сярэднім хапае на 2 гектары. У суботу утраіх мы перавезлі і рассыпалі на полі амаль 100 тон даламіту.
Аляксандр Яновіч:
– У сельгастэхніцы працую шосты год. На вапнаванні глебы нашы трактары працуюць разам. Мне ў гэтым сэнсе пашанцавала з калегамі – яны больш вопытныя механізатары. Што самае складанае ў рабоце? Усюды свае цяжкасці, але галоўнае, каб яна была – тады і капейчына будзе. А вось без справы сядзець не люблю.
Сяргей Туркін:
– Нашы трактары вапнуюць глебу ў КСУП «Варняны», «Гервяты» і «Гудагай», а «Уралы» – у КСУП «Міхалішкі» і РУП «Астравецкі саўгас «Падольскі». Пакуль адзін трактар у полі, два астатнія чакаюць. Чаму так? Месцамі яшчэ мокра. Нядаўна ў Завельцах вапнавалі глебу, паміж трактарамі – не больш пяці метраў адлегласці, адзін прайшоў па полі, а другі праваліўся… Загразнем утрох – і што тады рабіць?