Восеньскія клопаты гудагайскіх аграрыяў
Як з восеньскімі работамі спраўляюцца працаўнікі КСУП «Гудагай», мы даведаліся напрыканцы мінулага тыдня.
Сёлета ў КСУП «Гудагай» пад цукровыя буракі адведзена 270 гектараў. Намаганнямі двух буракаўборачных камбайнаў «Фервайт» салодкія караняплоды ўбіраліся на плошчы 10 гектараў. З аднаго гектара накопвалі каля 470 цэнтнераў.
– Буракі сёлета нядрэнна ўрадзілі, – гаворыць галоўны аграном КСУП «Гудагай» Андрэй Ненартовіч. – Балазе, пад іх быў зроблены задзел. Атрымаць добры ўраджай, спадзеючыся толькі на падтрымку «нябеснай канцылярыі», – няўдзячная справа: цукровыя буракі адчувальныя і да якасці глебы, і да яе перадпасяўной апрацоўкі. Пры іх вырошчванні важна ўлічыць усе агратэхнічныя нюансы. Спознішся з хімічнай праполкай – і страты будуць вызначацца дзясяткамі цэнтнераў.
Дзяржава аказвае вытворцам буракоў дапамогу. Страты на ранняй уборцы кампенсуюцца: вагу буракоў, якія адгрузілі на загрузачныя пункты з 29 жніўня па 10 верасня, павялічваюць на 20%, з 10 па 20 верасня – на 15%.
Уборкай і пагрузкай цукровых буракоў займаюцца працаўнікі КСУП «Гудагай». За дзень на Слуцкі цукровы завод адпраўляецца 8 вагонаў – каля 450 тон.
11 580 тон накапана цукровых буракоў, з якіх 10 250 тон вывезена на прыёмныя пункты.*
Бульба
Сярэдняя ўраджайнасць «другога хлеба» ў гаспадарцы складае 395 цэнтнераў з гектара – салідны паказчык.
– Сёлета бульба ва ўсіх добра урадзіла, – расказвае Аляксандр Замара, які не першы сезон працуе на бульбаўборачным камбайне. – За дзень накопваю пад 80 тон. Здараецца, што камбайн псуецца, таму раз на раз не прыходзіцца.
Пяты сезон працуе Аляксандр Замара на бульбаўборачным камбайн. Дапамагае яму ў гэтым Раман Пешкур.
Дапамагаюць Аляксандру чатыры паляводы, якія, стоячы на спецыяльнай пляцоўцы камбайна, выдаляюць камяні з транспарцёра, па якім прасоўваюцца бульбяныя клубні.Акрамя механізаванага «капача», на гудагайскім бульбянішчы працуюць беспрацоўныя з Астраўца, работнікі жыллёва-камунальнай гаспадаркі і канторы сельгаспрадпрыемства.
У КСУП «Гудагай» за дзень у сярэднім выкопваюць бульбу на 1,5 гектарах.
Паляводы Ганна Васілеўская і Іван Кандратовіч выдаляюць камні
2 940 тон накапана бульбы. Яна ўбрана на 74,5 гектарах (75%)*
Збожжа
Прамаруджванне на сяўбе азімых дорага каштуе – перакананы Андрэй Ненартовіч.
– Убралі цукровыя буракі, падрыхтавалі глебу – і адразу ў поле выпускаем сеялкі, – расказвае галоўны тэхнолаг гудагайскіх палёў.
Не першы год на сяўбе шчыруе Пётр Сяргей. Калегі ў адзін голас сцвярджаюць, што на такіх працаўніках і трымаецца гаспадарка.
Пётр Сяргей, сейбіт
– Калі няма перабояў з падвозам насення, дык за восень каля тысячы гектараў засяваю, – расказвае сейбіт. – Дзякаваць богу, тэхніка не падводзіць.Пад азімую пшаніцу адведзена 700 гектараў (насенне прыгорнута ў глебу на 57% плошчы), пад трыцікале – 1 160 гектараў (62%), пад жыта – 300 гектараў (133%).*
2 200 гектараў сёлета складзе азімы клін гаспадаркі, з іх 1 672 гектары (76% ад запланаванага) ужо засеяна.*
Кукуруза
«Каралева палёў» сёлета цалкам апраўдала сваю мянушку – вымахала пад тры метры і ганарліва пазірае на чалавека зверху ўніз, як сапраўдная каралева.
У КСУП «Гудагай» кукуруза ідзе на зялёную масу, якая потым стане спажыўным сіласам, і на зерне.
Непадалёк ад вёскі Філіпаны кукурузу ўбіраў збожжаўборачны камбайн КЗС-1218, на якім працаваў адзін з лепшых камбайнерскіх экіпажаў гаспадаркі – Яўген Грабоўскі і Аляксандр Ермаковіч.
Яўген Грабоўскі і Аляксандр Ермаковіч ўбіраюць кукурузу на зерне
– За дзень пад 100 тон намалочваем, – расказвае Яўген. – Канешне, убіраць кукурузу значна цяжэй, чым збожжавыя, але яна куды лепш сыплецца.– Камбайн часцей забіваецца, – далучаецца да размовы Аляксандр. – І жатка тут іншая. Галоўнае – трапіць у радкі.
Калі бункер камбайна цалкам запаўняецца жоўтымі кукурузнымі зярнятамі, іх адвозяць на новы сушыльны комплекс «Грын-вэй», дзе зерне даводзіцца да патрэбнай кандыцыі.
568 гектараў (57%) кукурузы ўбрана на сілас. Ураджайнасць зялёнай масы складае 423 цэнтнера з гектара. Абмалочана 100 гектараў кукурузы на зерне. Валавы намалот склаў 1 035 тон, ураджайнасць – 104 цэнтнеры з гектара.*
*Звесткі па стане на 23 верасня.
Зерне кукурузы з поля на сушылку возіць Віктар Васілеўскі
На буракаўборачным камбайне “Фервайт” працуе Віталь Мілэйша
Сяргей Трусевіч абраў шлях у сельскую гаспадарку па прыкладзе бацькі. Малады механізатар заняты на ўборцы буракоў
Эдвард Юркойць падвозіць збожжа
Палявод Дзмітрый Вішнеўскі засыпае насенне ў бункер сеялкі
Грамбоўскі Іван не толькі прывозіць у поле абеды, але і развозіць па хатах людзей.
Памочнік загадчыка раслінаводчага ўчастка №1 Леанард Мікліс
Вадзіцель Сяргей Гурскі
Вадзіцель Эдвард Безляповіч
Мікалай Лысанаў, вадзіцель
Адразу пасля арміі Чаславас Янкайціс прыйшоў працаваць у КСУП “Гудагай”. Малады вадзіцель возіць бульбу з поля да бульбасховішча.
