Свята нашай незалежнасці (+відэа)
Асноўныя мерапрыемствы, прысвечаныя Дню Незалежнасці, разгарнуліся 3 ліпеня. Пачаліся яны з урачыстага шэсця ветэранаў, ваенных, прадстаўнікоў органаў улады, грамадскіх арганізацый ад будынка райвыканкама да помніка загінуўшым землякам. Над калонамі луналі сцягі – дзяржаўныя, астравецкія, прадпрыемстваў і арганізацый, транспаранты і паветраныя шары.
Асаблівасцю сёлетняга свята стаў удзел у ім дзяўчат-барабаншчыц, якія прыгожа і звонка прайшлі па вуліцах нашага горада, а дзецям яшчэ і паказалі майстар-клас на пляцоўцы каля помніка.
Урачысты мітынг пачаўся з літаратурнай кампазіцыі, у якой нашчадкі пераможцаў падзякавалі героям вайны за сваё шчаслівае дзяцінства.
Гонар узняць дзяржаўны сцяг Рэспублікі Беларусь прадаставілі галоўнаму заатэхніку СВК "Гудагай" Віктару Алёкса, супрацоўніку Беларускай АЭС Дзмітрыю Лагуну і народнаму майстру Алене Малышавай.
Ад імя раённай улады жыхароў горада і раёна павіншавала са святам старшыня раённага Савета дэпутатаў Ірына Тальчук. Яна падзякавала ветэранам за мірнае неба над галавой і нагадала, што ўсе дасягненні нашай краіны – вынік нашага суверэнітэту і незалежнасці. Ірына Эдуардаўна паведаміла, што наш раён стаў пераможцам рэспубліканскага спаборніцтва і занесены на рэспубліканскую Дошку гонару. Кіраўнік раённага Савета дэпутатаў уручыла Ордэн Маці Ганне Лаўрэцкай, якая нарадзіла пяцёра дзяцей, і пажадала усім шчаслівага жыцця, працвітання і дабрабыту.
Ад імя ваеннаслужачых, якія зараз дыслацыруюцца ў раёне, выступіў камандзір вайсковай часці 7434 падпалкоўнік Віктар Жадобін. У гонар пераможцаў прагучаў ружэйны салют.
Памяць загінуўшых была ўшанавана хвілінай маўчання. У неба ўзвіліся дзясяткі паветраных шароў у колерах нацыянальнага сцяга і белых галубоў.
З-за няўстойлівага надвор’я і абяцаных сіноптыкамі дажджоў святочная праграма перамясцілася ў кінаканцэртную залу. А ў лесапарку гараджан чакалі гандлёвыя рады, паказальныя выступленні выратавальнікаў, цір і іншыя гульні і забавы.
