Перамогі юных мастакоў Астравеччыны

09:02 / 28.05.2018

Юныя таленты, якія робяць першыя крокі ў свет выяўленчага мастацтва пад кіраўніцтвам захопленых сваёй справай педагогаў Астравецкай дзіцячай школы мастацтва і яе філіялаў, сталі дыпламантамі і лаўрэатамі міжнародных і рэспубліканскіх конкурсаў.

ІV Міжнародны фестываль-конкурс «Мінск. Скрыжаванні» сабраў у сталіцы адораных і творчых хлопчыкаў і дзяўчынак краіны. Выкладчыкі Акадэміі мастацтваў давалі для дзяцей майстар-класы па сучасных тэхніках работы ў выяўленчым мастацтве, а пасля адбылася цырымонія ўзнагароджвання.
Дыпломы лаўрэатаў ІІІ ступені ў намінацыях «Жывапіс» і «Дэкаратыўна-прыкладное мастацтва» атрымалі Вікторыя Кіб і Аляксандра Лакомая. Іх настаўніцы Вікторыя Казіміраўна Варановіч і Дзіяна Сяргееўна Ендза адзначаны Падзячнымі пісьмамі за высокія вынікі ў падрыхтоўцы ўдзельнікаў і развіццё фестывальнага руху.

Лаўрэатамі V Міжнароднага фестывалю-конкурсу сучаснага мастацтва і крэатыўнай творчасці «Апельсінавая бяроза», які сёлета прайшоў у Оршы, сталі Анастасія Грыневіч (настаўнік В.К. Варановіч) і настаўніца мастацкага класа Д.С. Ендза.
Прыемная вестка нядаўна прыляцела з Польшчы: у ліку дыпламантаў прэстыжнага конкурсу «Захапленні і таленты – 2018» апынулася Вікторыя Раткевіч.
Поўныя эмоцый ад наведвання Белавежскай пушчы, са стосам акварэльных замалёвак з натуры і граматамі вярнуліся з абласнога пленэра юных мастакоў «Сімфонія велічы Белавежскай пушчы» Дар’я Пукшта (настаўнік Д.С. Ендза), Аляксандра Гануліч і Яна Юркойць (настаўнік В.В. Субаткевіч).
Малюнак яшчэ адной вучаніцы філіяла дзіцячай школы мастацтваў у Варнянах Эвеліны Бублевіч будзе выстаўляцца ў Інстытуце культуры ў межах выставы дасягненняў мастацкіх школ і школ мастацтваў краіны.

Гриневич Анастасия 2.jpg

работа Анастасіі Грыневіч

работа Дзіяны Ендзы

Падрыхтавала
Алена ЮРКОЙЦЬ.