О, спорт, – ты жыццё!
Прыемна адзначыць, што “сезон адкрыццяў” спартыўных аб’етаў у нашым раёне працягваецца. І з раёна яны усё больш актыўна перабазіруюцца ў Астравец, дзе падобных устаноў да нядаўняга часу яўна бракавала. Услед за доўгачаканай спартыўнай залай у эксплуатацыю здадзена цудоўнае міні-футбольнае поле са штучным пакрыццём.
Урачысты мітынг з гэтай радаснай нагоды пачаўся па традыцыі з Дзяржаўнага гімна Рэспублікі Беларусь і ўзняцця Дзяржаўнага сцяга краіны і сцяга Нацыянальнага Алімпійскага камітэта – гэтае ганаровае права было прадастаўлена капітанам лепшых каманд у леташнім раённым чэмпіянаце па міні-футболу: Аляксею Скурко, Алегу Тымулю, Сяргею Драздову, Аляксандру Буйко.
Для ўдзелу ў адкрыцці міні-футбольнага поля прыехаў адзін з асноўных “рухавікоў” гэтага праекта, старшыня Беларускай асацыяцыі федэрацыі футболу Беларусі Генадзій Мікалаевіч Нявыглас. Ён расказаў, што падобных палёў, якія ствараюцца ў Беларусі дзякуючы дабрачыннай праграме УЕФА, у нашай краіне пабудавана ўжо больш за 70. Адметнасцю гэтага года з’яўляецца тое, што з вялікіх гарадоў праграма будаўніцтва ўсё больш перабазіруецца ў невялікія гарадкі і райцэнтры. Астравец – адзін з такіх.
—Хочацца верыць, што, дзякуючы ў тым ліку і будаўніцтву такіх вось адпавядаючых еўрапейскаму ўзроўню футбольных палёў, спорт і, у прыватнасці, футбол у нашай краіне будзе актыўна развівацца, — сказаў на ўрачыстым мітынгу Генадзій Мікалаевіч. — І ўсё часцей Дзяржаўны сцяг Беларусі будзе ўздымацца ў гонар перамог нашых спартсменаў на міжнародных спаборніцтвах, у тым ліку і футбольных. Гэтае поле прызначана для прафесійнай падрыхтоўкі перш за ўсё юных футбалістаў – хоць практыка паказвае, што ў вячэрні час пляцоўкі актыўна выкарыстоўваюць для сваіх трэніровак ветэраны і аматары футбола.
—Я спадзяюся, што гэтае поле — толькі “першая ластаўка”, якая прынясе ў Астравец вялікі футбол – асабліва з улікам тых перспектыў, якія чакаюць ваш гарадок,— сказаў Генадзій Мікалаевіч, уручаючы юным спартсменам падарункі — прафесійныя футбольныя мячы, якія з’яўляюцца блакітнай марай любога правінцыяльнага футбаліста, і камплект дзіцячай спартыўнай формы.
З падарункамі – спартыўнай формай і спортінвентаром — прыехалі на адкрыццё новай спартыўнай пляцоўкі старшыня Гродзенскага аблвыканкама Сямён Барысавіч Шапіра і начальнік упраўлення па фізкультуры спорту і турызму аблвыканкама Віктар Уладзіміравіч Шніпко. А таксама – з цёплымі словамі.
—Я не так часта бываю ў Астраўцы, — сказаў у сваім вітальным слове Сямён Барысавіч, — але заўсёды прыязджаю ў ваш горад з вялікай радасцю. Таму, што вы зрабілі свой райцэнтр самым прыгожым горадам у вобласці, таму, што ў вас – самыя чыстыя вуліцы, самыя лепшыя сельскія населеныя пункты.
Канешне, чуць такія словы ад кіраўніка вобласці астраўчанам, якія шчыра любяць свой пахарашэўшы райцэнтр і ганарацца ім, было вельмі прыемна. Хочацца спадзявацца, што і міні-футбольнае поле ў нас таксама будзе самым лепшым — нягледзячы на тое, што падобнае ўжо было адкрыта ў Ашмянах, неўзабаве такія ж прымуць спартсменаў у Дзятлаве і Лідзе.
А старшыня райвыканкама Адам Дзмітрыевіч Кавалька, як заўсёды, не толькі павіншаваў спартсменаў з гэтай знакавай у іх жыцці падзеяй, але і прыадкрыў заслону над перспектывай — коратка, наколькі дазваляў фармат урачыстага мітынгу, расказаў, якая спартыўная будучыня чакае Астравец: ужо зроблена праектна-каштарысная дакументацыя на будаўніцтва новага сучаснага стадыёна з неабходным наборам усіх магчымых пляцовак і збудаванняў, пра які сённяшнія аматары спорту могуць толькі марыць. Плануецца яшчэ добраўпарадкаваць вадасховішча – і разам з зімовай хакейнай пляцоўкай і сучасным міні-футбольным полем гэта складзе ў мікрараёне Валадарскага, дзе жыве большая частка насельніцтва райцэнтра, цудоўны спартыўны комплекс.
…А затым настаў самы ўрачысты момант: Генадзь Мікалаевіч Нявыглас, Сямён Барысавіч Шапіра і Адам Дзмітрыевіч Кавалька перарэзалі сімвалічную чырвоную стужку пры ўваходзе на поле. І зрабілі сімвалічны першы ўдар па мячы. Ды што там удар – перапасаваўшыся, забілі першы, хай сабе таксама сімвалічны, гол.
А потым яшчэ і паглядзелі нейкі час гульню футбольных каманд Міхалішкаўскага сельсавета і Астраўца – да першага забітага гола, ужо сапраўднага, заліковага.
Такім чынам, міні-футбольнае поле ў Астраўцы не проста адкрыта – яно з першых жа хвілін пачало дзейнічаць. Хочацца верыць, што аматары футболу адпачываць яму не дадуць – тым больш, што Г.М. Нявыглас папярэдзіў, што асаблівасць яго штучнага пакрыцця ў тым, што частая і працяглая эксплуатацыя ідзе яму толькі на карысць.
А там – чаго ў жыцці не бывае?! – магчыма, і астравецкая футбольная зборная стане задаваць тон на абласных ці нават рэспубліканскіх спаборніцтвах.
Ніна АЛЯКСЕЕВА.