Соревновались через "не могу"
10:12 / 22.09.2016
З гэтымі юнакамі і дзяўчатамі сустракацца даводзілася не раз – штогод Астравецкі тэрытарыяльны цэнтр сацыяльнага абслугоўвання насельніцтва пры падтрымцы раённага выканаўчага камітэта, аддзела адукацыі, спорту і турызму, раённай арганізацыі РГА «Белая Русь» праводзіць спартыўныя мерапрыемствы для маладых людзей з інваліднасцю. Сёлета паўдзельнічаць у «Вясёлай спартландыі» вырашылі прадстаўнікі Астравеччыны, Ашмяншчыны і Смаргоншчыны.
Галоўны суддзя спаборніцтваў Вадзім Лебядзевіч тлумачыць заданні, дае некалькі хвілін на падрыхтоўку – і каманды «Маланка» (Астравец), «Мядзведзі» (Смаргонь) і «Дзьмухаўцы» (Ашмяны) выходзяць на старт.
На гэты раз для ўдзельнікаў спартландыі арганізатары падрыхтавалі ажно дзесяць конкурсаў: дартс, баскетбольныя кідкі, «Юны футбаліст» і «Юны хакеіст», «напішы слова», бег праз абручы і з ракеткамі з мячом, «Бульба», эстафета і конкурс капітанаў, падчас якога яны выбівалі свайго саперніка з круга гімнастычнымі мячамі.
На тварах – напружанне: кожнаму хочацца стаць пераможцам; ногі не стаяць на месцы ад хвалявання. Кіраўнікі каманд і валанцёры атрада «Прамень» ні на хвіліну не адыходзілі ад сваіх выхаванцаў – падтрымлівалі не толькі словам, але і пагладжвалі па галаве, адбымалі. Часам гэтага хапала, каб юнакі і дзяўчаты крыху супакоіліся. Іншым разам такія дзеянні не дапамагалі і пасля няўдалай спробы кінуць дроцік ці мяч у цэль на вачах удзельнікаў з'яўляліся слёзы адчаю.
Спакойна адносіцца да ўсяго таго, што адбывалася ў спартыўнай зале, немагчыма. Хацелася пакласці фотаапарат і дапамагчы ўдзельнікам падбегчы, кінуць мяч, забіць гол... Але ж гэта – спаборніцтвы, хоць і асаблівыя.
А наведвальнікі аддзяленняў праз «не магу» і «ў мяне нічога не атрымаецца» імкнуліся да перамогі. Калі сілы ўдзельнікаў спартландыі былі на сыходзе, ім на змену на спартыўнае поле выходзілі юныя артысты Цэнтра творчасці дзяцей і моладзі, якія песнямі і танцамі забаўлялі каманды.
Пасля невялікага адпачынку спаборніцтвы працягваліся: юнакі і дзяўчаты зноў бегалі, скакалі – і перамагалі…
Па выніках усіх этапаў былі падлічаны набраныя балы і прысуджаны месцы.
Перамогу ў той дзень святкавалі ўдзельнікі каманды «Маланка» з Астраўца, другое месца дасталося выхаванцам Смаргонскага аддзялення, трэцяе – «Дзьмухаўцам» з Ашмян. Але ніхто не пакінуў залу фізкультурна-спартыўнага комплекса «Старт» без падарункаў – усе ўдзельнікі астравецкай «алімпіяды» былі ўзнагароджаны індывідуальнымі падарункамі ад раённай арганізацыі «Белая Русь», медалямі, дыпломамі і кубкамі аддзела адукацыі, спорту і турызму і каманднымі падарункамі ад Астравецкага райвыканкама.
Алена СВЕТЛАЯ, фота аўтара.