Выпускнікам школ расказалі пра “атамныя” прафесіі
У гімназіі №1 Астраўца ў суботу было шматлюдна. Акрамя выпускнікоў школ Астравеччыны тут сабраліся прадстаўнікі Ашмянскага, Смаргонскага і Іўеўскага раёнаў. Падстава больш чым сур’езная – расказаць школьнікам пра прафесіі, запатрабаваныя на Беларускай атамнай электрастанцыі, прыехалі прадстаўнікі Беларускага дзяржаўнага ўніверсітэта і Міжнароднага дзяржаўнага экалагічнага інстытута імя А.Д. Сахарава БДУ.
Прафарыентацыйныя сустрэчы ў школах – звычайная з’ява. Такая ж праходзіла ўпершыню.
– Школьнікі вобласці пастаянна ўдзельнічаюць у падобных мерапрыемствах. Звычайна яны наведваюць вышэйшыя навучальныя ўстановы. На гэты раз ініцыятарам сустрэчы стаў Міжнародны дзяржаўны экалагічны інтстытут імя А.Д. Сахарава БДУ – і сёння школьнікаў чакаў сапраўдны кірмаш прафесій, падчас якой яны атрымалі інфармацыю па паступленні ў вышэйшыя навучальныя ўстановы нашай краіны, – адзначыла начальнік аддзела агульнай сярэдняй і дашкольнай адукацыі галоўнага ўпраўлення адукацыі Гродзенскага аблвыканкама Святлана Кавалеўская. – На сустрэчу мы запрасілі школьнікаў з чатырох паўночных рэгіёнаў вобласці, якія на павышаным узроўні вывучаюць фізіку, хімію і біялогію, – і бачым, што ім тут цікава.
Напачатку мерапрыемства прадстаўнікі фізічнага і хімічнага факультэтаў Беларускага дзяржаўнага ўніверсітэта і Міжнароднага дзяржаўнага экалагічнага інстытута імя А.Д. Сахарава БДУ прадэманстравалі школьнікам відэапрэзентацыі і расказалі ім пра спецыяльнасці і правілы паступлення на адны з самых прэстыжных на сённяшні дзень спецыяльнасцей.
– Беларускі дзяржаўны ўніверсітэт і Міжнародны дзяржаўны экалагічны інстытут імя А.Д. Сахарава БДУ ў прыватнасці – вядучыя вышэйшыя навучальныя ўстановы краіны па падрыхтоўцы кадраў для Беларускай атамнай электрастанцыі, – адзначыў дэкан факультэта маніторынга навакольнага асяроддзя МДЭІ імя А.Д. Сахарава Уладзіслаў Жураўкоў. – Наш інстытут выпускае спецыялістаў па радыяцыйнай бяспецы з 2008 года – і на сёння больш за 25 нашых выпускнікоў працуе на Беларускай атамнай электрастанцыі. Дарэчы, сёлета таксама нашы выпускнікі праходзяць практыку на гэтым прадпрыемстве – і будуць накіраваны сюды на свае першыя працоўныя месцы.
Падчас прафарыентацыйнага мерапрыемства выпускнікоў школ чакалі і пазнавальныя майстар-класы з дэманстрацыяй шматлікіх фізічных, хімічных і эколага-біялагічных доследаў.
– Я з дзяцінства марыла звязаць сваё жыццё з біялогіяй і экалогіяй, – рассказала адзінаццацікласніца Гервяцкай школы Аляксандра Сыс. – І пасля сённяшняй сустрэчы з прадстаўнікамі ўніверсітэта і студэнтамі, якія там вучацца, маё жаданне толькі стала мацнейшым. Цяпер упэўнена, што буду паступаць у БДУ, а пасля яго заканчэння хачу вярнуцца на радзіму – на Астравеччыну, каб унесці ўклад у яе развіццё.
Цікавым момантам прафарыентацыйнай праграмы стала наведванне Інфармацыйнага цэнтра Беларускай атамнай электрастанцыі, дзе для школьнікаў правялі экскурсію, яны змаглі задаць цікавячыя іх пытанні і атрымаць адказы.
Закончылася прафарыентацыйная сустрэча індывідуальнымі кансультацыямі для тых, хто зарання ці толькі падчас яе вызначыўся з накірункам для паступлення.