В Островце отдали дань памяти воинам-интернационалистам
У Астраўцы ля помніка воінам-інтэрнацыяналістам прайшоў мітынг, прысвечаны памяці загінуўшых у Афганскай вайне.
Сёлета мерапрыемства, прысвечанае Дню памяці воінаў-інтэрнацыяналістаў, праходзіла асабліва ўрачыста, шчыра і святочна – і значную ролю ў гэтым адыграў памятны знак ахвярам вайны ў Афганістане, які з’явіўся ў Астраўцы ў мінулым годзе.
Ушанаваць памяць загінуўшых воінаў-інтэрнацыяналістаў прыйшлі прадстаўнікі раённай улады, грамадскіх аб’яднанняў, ваенізаваных структур, моладзь і жыхары Астравеччыны, якія проста не змаглі прайсці міма.
– Удзельнікі Афганскай вайны прайшлі праз шматлікія выпрабаванні – і гэта на ўласным вопыце ведаюць нашы шаноўныя афганцы. Тысячы салдат і афіцэраў ішлі туды не за медалямі і ордэнамі, а каб выканаць інтэрнацыянальны абавязак, – адзначыла ў выступленні старшыня раённага Савета дэпутатаў Ірына Эдуардаўна Тальчук. – Паважаныя воіны-афганцы! Вы, былыя ўдзельнікі баявых дзеянняў, цяпер з’яўляецеся актыўнымі праваднікамі дзяржаўнай палітыкі Рэспублікі Беларусь. На вашым прыкладзе выхоўваецца моладзь. У гэты памятны дзень мы шчыра дзякуем за ваш гераізм і вайсковы подзвіг.
Са словамі ўдзячнасці да воінаў-інтэрнацыяналістаў звярнуліся ваенны камісар Раман Аляксандравіч Курлоў, старшыня раённага савета ветэранаў Расціслаў Арсенцьевіч Герт і камендант пагранічнай камендатуры “Гудагай” Яўген Віктаравіч Паўлоўскі.
Са словамі ў адказ выступіў удзельнік Афганскай вайны Вацлаў Андрэевіч Казлоўскі:
– Нам, воінам-інтэрнацыяналістам, прыемна, што пра нас памятаюць і ўшаноўваюць – і за гэта дзякуй усім. Будзем імкнуцца і надалей быць годным прыкладам для падрастаючага пакалення. А галоўнае – хацелася б усім пажадаць цаніць і шанаваць мірнае і спакойнае жыццё.
Урачыстае ўскладанне вянка ад раённай улады і кветак ад усіх прысутных, трайны памятны залп, марш духавога аркестра, дрыготкі агеньчык свечкі і кавалачак хлеба на стограмоўцы – мы памятаем пра тых, хто не вярнуўся і будзем памятаць заўсёды!
А воіны-інтэрнацыяналісты пасля мітынга адправіліся праведаць сваіх таварышаў, якія назаўсёды засталіся маладымі і ўсмешлівымі – астравецкіх хлопцаў Іосіфа Канстовіча і Станіслава Бялячыца, якія не вярнуліся з той вайны. Вечная ім памяць і супакой.