Праздник мудрости и таланта в Островце отметили концертом
13:07 / 04.10.2016
– Наша задача – забяспечыць вам спакойную старасць і гарантаваную сацыяльную абарону, – сказала, павіншаваўшы шматлікіх гасцей свята, старшыня раённага Савета дэпутатаў Ірына Эдуардаўна Тальчук.
Старшыня раённага савета ветэранаў Расціслаў Арсенцьевіч Герт падзяліўся з гдедачамі ўспамінамі пра Астравец сваёй маладосці – многія з прысутных маглі б дапоўніць іх падрабязнасцямі свайго жыцця і працоўнай біяграфіі. Расціслаў Арсенцьевіч з гонарам адзначыў, што сённяшні Астравец – зусім не той пасёлак гарадскога тыпу, які сустракаў маладых спецыялістаў, што прыязджалі сюды па размеркаванні ў 60-70-ых гадах – наш зараз ужо горад добра ведаюць не толькі ў краіне, але і ў свеце.
А падарунак для ветэранаў зрабілі… самі ветэраны – найбольш актыўныя і таленавітыя з іх. Удзельнікі хору ветэранаў пад кіраўніцтвам Дануты Папені выканалі некалькі цудоўных песень. Парадавалі любімымі песнямі маладосці салісты – Ганна Варэйка, Ірына Тумко, Галіна Гіцэвіч, мужчынская група хору, а таксама вядомыя астравецкія кампазітары Аляксандр Альховік і Аляксандр Якіменка. Адну са сваіх шматлікіх песень выканала і ўсебакова адораная Людміла Кухарэвіч.
А канцэрт беларускага расіяніна (ці расійскага беларуса?) Валерыя Дзюміна доўжыўся ці не ўдвая больш запланаванага: гледачы спявалі разам з артыстам, танцавалі пад яго песні – і ніяк не хацелі адпускаць яго са сцэны.
У той дзень у кінаканцэртнай зале панаваў цёплы, хатні настрой – нібы сабраліся разам добрыя знаёмыя і сябры, якім не так часта выпадае пабыць разам – і, сустрэўшыся, яны не хацелі развітвацца і імкнуліся як мага даўжэй пабыць разам.
Ніна АЛЯКСЕЕВА.