Кто из островецких школьников будет защищать честь района на областной олимпиаде
10:00 / 16.12.2014
Чатырнаццаць школьнікаў прадставяць Астравецкі раён на абласным этапе рэспубліканскай алімпіяды па агульнаадукацыйных прадметах.
Папярэдне ў раёне прайшоў школьны этап алімпіяд сярод вучняў 8-11 класаў. Па іх выніках 145 школьнікаў трымалі сур’ёзны алімпіядны экзамен на раённым этапе па матэматыцы, біялогіі, хіміі, фізіцы, геаграфіі, беларускай, рускай, англійскай і нямецкай мовах, абслугоўваючай і тэхнічнай працы, інфарматыцы, гісторыі, грамадазнаўстве, астраноміі. У выніку 43 школьнікі былі ўзнагароджаны дыпломамі рознай ступені: 12 вучняў атрымалі Дыпломы І ступені, 8 школьнікаў – другой і 23 алімпіяднікі – Дыпломы ІІІ ступені.
Найбольшую колькасць узнагарод заваявалі алімпіёнікі з гімназіі №1 – 19, дзесяць дыпломаў атрымалі вучні СШ №1, сярод сельскіх школ найбольшая колькасць дыпломаў у навучэнцаў Падольскага НПК – чатыры.
Аднак не ўсе пераможцы і прызёры раённага этапу змогуць прыняць удзел у абласным этапе рэспубліканскіх алімпіяд.
Перш чым трапіць на абласную алімпіяду, неабходна прайсці абласны рэйтынгавы адбор. Сёлета рэйтынгавую шкалу пераадолелі 14 юных алімпіяднікаў (у мінулым годзе такіх было 20) – яны і будуць прадстаўляць наш раён на абласным этапе рэспубліканскай алімпіяды па дзевяці прадметах. Яшчэ пяць школьнікаў трапілі ў рэзерв – гэта значыць, калі хтосьці “ з асноўнага саставу” не зможа прыняць удзел у абласным этапе, “рэзервіст” зможа заняць свабоднае месца і прадэманстраваць свае веды на спаборніцтвах у вобласці.
Такім чынам, на алімпіядзе па матэматыцы наш раён прадставяць васьмікласнік СШ №1 Арцём Маладцоў і гімназісткі Анастасія Карнэлік і Віялета Шаўліс.
Гонар раёна па хіміі будзе абараняць дзесяцікласніца гімназіі №1 Ангеліна Пятровіч.
Вераніка Анімуцкая з гімназіі №1 прыме ўдзел у алімпіядзе па нямецкай мове.
Вучаніцы сярэдняй школы №1 Маргарыта Шаўчэнка і Ксенія Марцінчык змогуць паўдзельнічаць у алімпіядзе па рускай мове.
На алімпіяду па грамадазнаўстве адправіцца дзесяцікласніца гімназіі №1 Вікторыя Сідаровіч.
Тры школьнікі прайшлі абласны рэйтынгавы адбор на абласную алімпіяду па фізіцы: Лізавета Клімчэня з СШ №1, Ігар Азевіч і Артур Петрулевіч з гімназіі №1.
Адзінаццацікласніца Аляксандра Папкова з Падольскага НПК стане ўдзельніцай абласной алімпіяды па беларускай мове.
Гімназіст Андрэй Малочка зможа прыняць удзел у алімпіядзе па геаграфіі.
А адзінаццацікласнік гімназіі №1 Уладзіслаў Цярэшка – у алімпіядзе па астраноміі.
Яшчэ пяць школьнікаў: Таццяна Іллюк (Падольскі НПК), Кацярына Тумашчык (СШ №1), Марта Пясляк (гімназія №1), Ігар Пясляк (СШ №1) і Яна Шаблаўскайце (Гервяцкая СШ) – увайшлі ў рэзерв абласной каманды.
Абласныя алімпіяды сёлета пачнуцца 13 студзеня. Пажадаем юным алімпіяднікам поспеху!
Алена ЯРАШЭВІЧ.