Жители Островетчины приветствовали реликвии Св. Терезы Младенца Иисуса
Сваё падарожжа па свеце яна распачала пасля смерці, а Беларусь стала 76-й краінай, куды завітала святая. З 13 па 16 ліпеня на Астравеччыне адбывалася перэгрынацыя рэліквій святой Тэрэзы ад Дзіцятка Езус пад дэвізам – “Маё пакліканне – гэта любоў”.
Да касцёла святога Юрыя ў Варнянах бясконцым жывым ручайком сцякаліся людзі: бабулі, якія амаль штодзень ходзяць на імшу, маладыя сямейныя пары, людзі сярэдняга ўзросту, дзеткі, моладзь, хворыя і нямоглыя… Многія прыходзілі заўчасна, каб за гадзіну да сустрэчы са святой памаліцца і падрыхтавацца да доўгачаканага спаткання. Іншыя прыходзілі хвіліна ў хвіліну.
Ніводзін чалавек не сядзеў на лаўцы. Людзі нецярпліва чакалі святую заступніцу. Многія ў руках трымалі ружы: белыя, жоўтыя, чырвоныя…
І неба не вытрымала такога напружанага чакання – разрадзілася дажджом. Дажджом – суцэльнай сцяной. Дажджом – выпрабаваннем веры. Дажджом ачышчэння…
Святая казала, што, калі памрэ, то будзе пасылаць з нябёсаў пялёсткі ружаў – як ласку Пана Бога. Дажджавыя пялёсткі цалавалі твары сустракаючых – а дарога да храма ператварылася ў ружавую стужку.
…Работнікі мясцовага лясніцтва неслі рэлікварый, а святую суправаджалі браты кармеліты. Прывітаць святую Тэрэзу ад Дзіцятка Езус у гэты дзень прыйшлі тыя, хто прагнуў гэтай сустрэчы сэрцам, а не розумам. Святая імша, якую цэлебраваў айцец Бярнард, дазволіла вернікам раздзяліць радасць ад прысутнасці святой і адчуць любоў: да Бога, бліжняга і сябе. Любоў, якую несла святая Тэрэза праз усё свае кароценькае, бы след знічкі, жыццё; любоў, якая і зараз асвятляе жыццёвыя дарогі тысячы вернікаў.
“Любіць – сябе дарыць, любіць – сябе дарыць, любіць – сябе дарыць, дарыць сябе без меры.
Маці Божая Шкаплерная, маліся за нас!
У многіх вернікаў Каталіцкага Касцёла лета звязана з наведваннем санктуарыяў Маці Божай. Людзі накіроўваюцца да святых месцаў, каб атрымаць патрэбныя ласкі аздараўлення або навяртання, падзякаваць Маці за выслуханыя просьбы. 13 і 14 ліпеня месцам сустрэчы і супольнай малітвы вернікаў з нашай краіны і з-за мяжы стаў санктуарый Маці Божай у Гудагаі.
Калі я гавару мовай людзей і анёлаў, а любові не маю, то я быццам звонкая медзь, або як гулкія цымбалы.Калі я маю дар прароцтва і ведаю ўсе таямніцы, веды, каб перастаўляць горы, але любові няма, я – нішто.І калі раздам усю маёмасць сваю я без рэшты, і сябе ахвярую, а не маю любові, няма мне з гэтага карысці.”
У сваёй аўтабіяграфічнай кнізе “Гісторыя адной душы” святая Тэрэза апісала ўласныя перажыванні, цярпенні – сваю дарогу і сваё жыццё з Богам…
Святая Тэрэза ад Дзіцятка Езус нарадзілася на поўначы Францыі. Калі дзяўчынка была зусім маленькай, памерла маці, і Тэрэза ахвяравала сваё жыццё Найсвяцейшай Панне Марыі. У пятнаццаць гадоў дзяўчынка адчула пакліканне. Настаяцельніца кляштара кармелітак адмовіла дзяўчыне, спасылаючыся на яе ўзрост. Са сваёй просьбай Тэрэза звярталася нават да папы Льва XIII падчас аўдыенцыі: яна ведала, калі Папа згодзіцца – пагодзяцца і ўсе астатнія. Мара стала рэчаіснасцю толькі праз год: у 1890 годзе будучая святая склала вечныя шлюбы. І з дня, калі ўпершыню адзела габіт, Тэрэза крочыла “малой дарогай”. Яна адчувала, што Бог адорвае сваёй мудрасцю “малых”, а не светачаў навукі – пагэтаму яна яшчэ вядомая як “Малая святая Тэрэза”.
Сёстры па супольнасці не заўсёды разумелі яе. У кляштары Тэрэза захварэла на сухоты, аднак, нягледзячы на хваробу, якая забірала шмат сіл, працягвала прысвячаць сваё жыццё служэнню Богу і людзям. Яна прадчувала хуткую смерць – і яшчэ з большай моцай працягвала працаваць і пісаць. Адышла ў вечнасць будучая святая ва ўзросце 24 гадоў. Папа Пій ХІ у 1923 годзе абвясціў яе благаславёнай, а праз два гады святая Тэрэза была кананізавана.
Падчас Сусветнага дня моладзі ў Парыжы Ян Павел ІІ абвясціў святую доктарам Касцёла. У гісторыі святая Тэрэза ад Дзіцятка Езус стала трэцяй жанчынай, якая атрымала гэты тытул. Святая лічыцца апякункай Расіі, Францыі, законаў кармелітак, тэрэзак і тэрэзіянак, каталіцкіх місій і місіянераў.
…Пасля заканчэння імшы людзі не разыходзіліся па дамах, кожны імкнуўся падысці бліжэй да рэлікварыя і за некалькі секунд, пакуль рукі дакраналіся да халоднага шкла, адчуць цеплыню, папрасіць пра сваё асабістае ці падзякаваць святой Тэрэзе.
Людзі прыходзілі і на начное чуванне. Рэлікварый ні на імгненне не пакідалі без малітваў.
…А ў паветры лунаў пах ружаў – як напамін аб тым, што святая Тэрэза чуе цябе кожную хвіліну. Няхай у жыцці не надарацца вялікія падзеі ці адкрыцці, аднак ты будзеш ведаць сваю маленькую дарогу і крочыць па ёй, несучы любоў.
______________________
Алена ГАНУЛІЧ.
Фота аўтара.