“Крыштальны журавель” наведаў Астравец

Пераможцы рэспубліканскага конкурсу “Настаўнік года”, удзельнікі клуба “Крыштальны журавель” пад кіраўніцтвам начальніка цэнтра развіваючых педагагічных тэхналогій Акадэміі паслядыпломнай адукацыі Івана Фёдарава завіталі на Астравеччыну, каб правесці ўрокі і майстар-класы для настаўнікаў школ і педагогаў дашкольнага выхавання. Сустракалі гасцей у гімназіі №1 і дзіцячым садзе №3 нашага горада.

Падобныя выезды ў раёны члены клуба “Крыштальны журавель” арганізоўваюць некалькі разоў на год. Для настаўнікаў і выхавальнікаў гэтыя сустрэчы становяцца своеасаблівым міні-конкурсам “Настаўнік года” і магчымасцю пераняць бясцэнны вопыт калег.

“Крыштальнаму жураўлю” 12 гадоў. За гэты час многія з яго членаў сталі кіраўнікамі – дырэктарамі школ, начальнікамі аддзелаў адукацыі і іншых устаноў. І гэта – своеасаблівы гонар клуба.

– За гэты час мы больш чым 50 разоў выязджалі ў розныя рэгіёны краіны. І бачым эфектыўнасць нашай работы, – расказвае Іван Фёдараў. – Астраўцу сёлета пашанцавала. Мы прыехалі сюды напярэдадні старта першага этапа конкурсу “Настаўнік года” – і, думаю, гэта залог будучых перамог вашых настаўнікаў на рэспубліканскім узроўні.

У дзень педагагічнай сустрэчы ў гімназію №1 і дзіцячы сад №3 з’ехаліся настаўнікі і выхавальнікі з устаноў раёна. Цікавыя самапрэзентацыі, урокі матэматыкі, рускай літаратуры, біялогіі, англійскай мовы, фізікі, гісторыі, беларускай мовы і хіміі, заняткі з дашкольнікамі і малодшымі школьнікамі, майстар-классы на розныя тэмы – настаўнікі-канкурсанты дзяліліся сваімі напрацоўкамі, а астравецкія педагогі спасцігалі новыя для іх методыкі выкладання.

– Уражанні самыя найлепшыя, – гаворыць дырэктар Гудагайскай сярэдняй школы Уладзімір Крывец. – Тым больш што сёння я трапіў на майстар-клас настаўніцы, якая некалі выкладала фізіку мне, і ў многім дзякуючы ёй я выбраў педагагічную спецыяльнасць. Увогуле было цікава пазнаёміцца з лепшымі настаўнікамі рэспублікі, паглядзець, як яны выкладаюць свае прадметы. Ёсць над чым задумацца, узяць штосьці ў сваю педагагічную “скарбонку” і потым выкарыстаць у сваёй практыцы.

– З задавальненнем папрысутнічала на ўроках і майстар-класах пераможцаў рэспубліканскага конкурсу. Члены клуба з’яўляюцца для мяне прыкладам прафесійнага майстэрства, і мая даўняя мара – сустрэцца з гэтымі таленавітымі людзьмі – сёння ажыццявілася, – падзялілася ўражаннямі настаўніца гімназіі №1 Вольга Саковіч.

Не менш задавальнення ад сустрэчы з лепшымі педагогамі краіны атрымалі і дзеці – яны актыўнічалі, дэманстравалі свае веды і зараблялі высокія адзнакі.

– Сёння я наведаў некалькі ўрокаў і бачу, што дзеці адукаваныя, умеюць думаць і гаварыць, а гэта пацвярджае, што вашы педагогі – таленавітыя і адданыя сваёй прафесіі, – лічыць кіраўнік “Крыштальнага жураўля” Іван Фёдараў.

…Цікава, захапляльна, творча – гэтымі характарыстыкамі суправаджаліся ўрокі і майстар-класы, якія давалі лепшыя педагогі краіны – а значыць, рэспубліканскі семінар-акцыя быў арганізаваны недарэмна.

 СЛОВА СПЕЦЫЯЛІСТУ:

– Педагог – гэта чалавек, якія пастаянна развіваецца і знаходзіцца ў творчым пошуку. Сёння настаўнікі Астравеччыны мелі магчымасць пазнаёміцца з лепшымі педагогамі краіны, членамі клуба “Крыштальны журавель”. Гэтую ідэю мы выношвалі доўга і сёння рады, што яны прыехалі да нас і падзяліліся вопытам работы. Такія зносіны будуць садзейнічаць прафесійнаму росту нашых настаўнікаў, – упэўнена метадыст раённага вучэбна-метадычнага кабінета Людміла Апановіч.