З Пінска ў Астравец, ці Як малады спецыяліст Аляксеў Іеўлеў трапіў у ПМС
12:00 / 06.06.2026
З нагоды прафесійнага свята і юбілею прадпрыемства ўзгадваем яго гісторыю і расказваем пра людзей, якія цяпер яе ствараюць.
Аляксей Іеўлеў, майстар будаўніча-мантажных работ:
– У школьныя гады я не ведаў, кім хачу стаць. Бацька параіў паступаць у Пінскі дзяржаўны аграрна-тэхнічны каледж імя Кляшчова – у нашым горадзе гэта адна з самых прэстыжных навучальных устаноў. Хоць наш рэгіён і лічыцца буйнейшым у Беларуcі па плошчы меліяраваных зямель, спецыялізацыю «меліярацыя і водная гаспадарка» выбраў выпадкова… Як, дарэчы, і трапіў у Астравец. Па-першае, мне хацелася ўбачыць і пазнаць Беларусь з іншага канца; па-другое, як мага далей ад’ехаць ад дому. (Усміхаецца.)
У каледж на прафарыентацыйныя сустрэчы неаднойчы прыязджалі прадстаўнікі Астравецкага прадпрыемства меліярацыйных сістэм. Прывабіла жыллё і даплаты маладому спецыялісту. Дырэктар слова стрымаў.
Працую тут усяго два месяцы, дзякуючы падтрымцы вопытных калег актыўна асвойваю тонкасці прафесіі. Прамыўка дрэнажу, ачыстка каналаў, падсеў травы – з многімі спецыфічнымі задачамі меліярацыі паспеў пазнаёміцца. Парадавала, што на прадпрыемстве прыязна сустрэлі і прынялі як свайго – калектыў аказаўся дружным.
Пакуль не хачу загадваць нешта глабальнае – наперадзе яшчэ два гады адпрацоўкі. З бліжэйшых планаў – сумясціць работу з вучобай і завочна атрымаць вышэйшую адукацыю па накіраванні ад ПМС у Беларускай сельгасакадэміі.
