Надзея Ненартовіч: удзячна калектыву Астравецкага ПМС за давер

10:00 / 06.06.2026

Астравецкае прадпрыемства меліярацыйных сістэм піша сваю гісторыю на працягу некалькіх дзесяцігоддзяў. За гэты перыяд арганізацыя зведала розныя часы: ад сур’ёзных выпрабаванняў да росквіту і стабільнасці. Аднак нязменным заставалася галоўнае – клопат пра меліяраваныя землі. Без нястомнай працы работнікаў гэтай галіны Астравеччына не мела б сённяшніх высокіх ураджаяў і вялікіх надояў.

З нагоды прафесійнага свята і юбілею прадпрыемства ўзгадваем яго гісторыю і расказваем пра людзей, якія цяпер яе ствараюць.

Надзея Ненартовіч, начальнік вытворча-тэхнічнага аддзела, старшыня прафсаюзнай пярвічнай арганізацыі:

– Хоць на прадпрыемстве я адносна нядаўна, з 2022 года, але за гэты час прыкіпела душой і да яго, і да нашага цудоўнага калектыву.

Да гэтага каля 10 гадоў была галоўным аграхімікам Астравецкага раёна. Меліярацыя хоць і звязана непасрэдна з сельскай гаспадаркай, тым не менш, была для мяне новай сферай. Вельмі ўдзячна вопытным калегам, якія дапамагалі, асабліва Рыгору Сцяфанавічу Багатку і Лідзіі Уладзіміраўне Сухажэўскай.

Па сутнасці наш вытворча-тэхнічны аддзел – адно з найбольш важных структурных падраздзяленняў прадпрыемства. Адсюль пачынаецца ўвасабленне ў жыццё задач па рэканструкцыі аб’ектаў, рамонтна-тэхнічных работах і многае іншае.

…Вельмі ўдзячна калегам за давер, што абралі мяне прафсаюзным лідарам. Грамадская дзейнасць адкрыла другое дыханне і дала магчымасць рэалізаваць сябе. Паездкі і экскурсіі, удзел у шматлікіх ініцыятывах, акцыях, святах, флэшмобах, падтрымка ветэранаў і правядзенне конкурсаў для дзетак – жыццё ў нашай пярвічцы цікавае і насычанае.