Репортёр выходит в свет: что представляет наибольшую опасность для детей

10:00 / 01.06.2026

Дзень абароны дзяцей нагадвае нам, дарослым, што найлепшыя інвестыцыі ў заўтрашні дзень – любоў, падтрымка, безумоўнае прыняцце свайго сына ці дачкі ўжо сёння. У астраўчан і гасцей горада карэспандэнт «раёнкі» пацікавіўся, што ўяўляе галоўную небяспеку для сучасных дзяцей.

Аляксей Скурко, аператар, з дачкой Агнэсай

Агнэса:

– Незнаёмцы! Тата і мама вучаць, што нельга размаўляць з чужымі.

Аляксей:

– Небяспека падсцерагае дзяцей на кожным кроку. Таму галоўная задача бацькоў – навучыць іх элементарным правілам паводзін дома, на вуліцы і на дарозе.

Іна Кавалеўская, загадчык аддзела па кінавідэаабслугоўванні насельніцтва:

– Самая небяспечная рэч – інтэрнэт. Зразумела, варта ўлічваць, якому кантэнту аддае дзіця перавагу. Тым не менш, там шмат рэкламы, у тым ліку шкоднай.

З-за «стралялак» на камп’ютары, мне здаецца, сціраецца мяжа паміж гульнёй і рэальнасцю, адбываецца прытупленне эмоцый, маю на ўвазе эмпатыю. Гэта ў сваю чаргу параджае жорсткасць, якая прыводзіць да булінгу. Лічу, што бацькі абавязкова павінны кантраляваць, якія сайты наведвае сын ці дачка, а таксама час знаходжання ў інтэрнэце.

Галоўнае – стасавацца са сваімі дзецьмі, размаўляць, каб ведаць, што адбываецца ў іх жыцці, і своечасова прыйсці на дапамогу.

Уладзімір Шыла, пенсіянер:

– Дзеці даўно выраслі, унукі таксама – самай малодшай 10 гадоў, таму складана адказаць на пытанне. Многія лічаць, што ад інтэрнэту варта іх засцерагаць, але, думаю, тое, што падлеткі бязвылазна сядзяць у тэлефонах, – усяго толькі мода, якая абавязкова міне.

Важна, каб у сям’і панавалі мір, згода, узаемаразуменне, каб дзіця з маленства ведала, што такое «добра» і «дрэнна», паважала старэйшых і прыслухоўвалася да іх парад.

Анжаліка і Уладзімір Шэпко з дачкой Ксеніяй

Анжаліка:

– Усё залежыць ад узросту дзіцяці. Малышы патрабуюць большай увагі ў плане бяспекі, за імі трэба глядзець, каб не выбеглі на праезджую частку, не ўпалі, катаючыся з горкі. З падлеткамі фокус крыху змяшчаецца ў бок інтэрнэту. Варта адсочваць, з кім стасуецца ў мэсэнджарах ваша дзіця і на якіх сайтах праводзіць найбольш часу.

Уладзімір:

– Думаю, што наркотыкі прадстаўляюць галоўную небяспеку для дзяцей. На слыху выпадкі, калі падлетку невядомыя людзі прапаноўваюць падзарабіць у якасці кур’ера і даставіць у вызначанае месца пакунак, а насамрэч гэта небяспечныя рэчывы. Бацькі павінны тлумачыць дзецям, што грошы проста так не дастаюцца – іх трэба зарабіць сваёй працай.