«Цырымонію векавой славы» на раённым свяце аграрыяў зладзіў прафсаюз работнікаў АПК
Нечаканы і прыемны сюрпрыз кіраўніцтва раёна і гаспадарак на ўрачыстым святкаванні Дня работнікаў сельскай гаспадаркі атрымала ад раённай арганізацыі Беларускага прафсаюза работнікаў АПК і яе лідара Юрыя Адулы. На «Цырымоніі векавой славы» ўшанавалі тых людзей, хто развівае эканоміку раёна, і вядзе са сабой да новых вяршынь і дасягненняў цэлыя калектывы.
Намінацыя «Мудрасць і сіла»
За шматгадовую працу, за вопыт, які стаў апорай для цэлага пакалення; за адно з лепшых прадпрыемстваў раёна ўзнагародзілі кіраўніка, чыё імя даўно стала сінонімам поспеху і надзейнасці, – дырэктара КСУП «Гудагай» Эдуарда Садоўскага.
Намінацыя «Надзейны рост»
За стабільнасць, дынамічнае развіццё, за гаспадарку, якая ўпэўнена трымаецца абранага курса, – дырэктара КСУП «Гервяты» Ігара Жданава.
Намінацыя «Сіла абнаўлення і адраджэння»
За смеласць, за ўменне ўдыхнуць у прадпрыемства жыццё, за вынікі, якія радуюць раён, – узнагароду, як сімвал таго, што нават сухая галінка можа ізноў зазелянець, атрымаў дырэктар РУП «Астравецкі саўгас «Падольскі» Дзяніс Кірпа.
Намінацыя «Ураджай надзеі»
За рэкордныя надоі ў гэтым годзе, за тое, што прадпрыемства стала вытокам гонару для ўсяго раёна, адзначылі дырэктара КСУП «Міхалішкі» Вадзіма Саковіча.
Намінацыя «Надзея на будучыню»
За стойкасць у няпростых умовах, за спробы захаваць гаспадарку насуперак цяжкасцям, за тое, што нават у час перамен чалавек застаецца з зямлёй, – дырэктара КСУП «Варняны» Андрэя Стаповіча.
Намінацыя «Захавальнікі здароўя і клопату»
За чуласць, прафесіяналізм і вернасць справе, за здароўе кожнай жывёлы – дырэктара раённай ветэрынарнай станцыі Наталлю Назараву.
Намінацыя «Сіла радаслоўнай»
За карпатлівую працу, дакладнасць і ўнёсак у жывёлагадоўлю раёна – дырэктара селекцыйна-племяннога цэнтра жывёлагадоўлі Надзею Сасноўскую.
Намінацыя «Тэхнічная стабільнасць»
За арганізацыю, дысцыпліну і ўменне трымаць усё пад кантролем, за тое, што тэхніка не падводзіць пры любым надвор’і, – дырэктара сельгастэхнікі Аляксандра Шчуку.
Намінацыя «Дыханне зямлі»
За ўрадлівасць глебы, за працу, якая не заўсёды бачна, але вельмі патрэбна – дырэктара прадпрыемства меліярацыйных сістэм Вадзіма Вянгроўскага.
Намінацыя «Апора развіцця»
За мудрае кіраўніцтва і стратэгічнае бачанне, за тое, што сельская гаспадарка – гэта не проста галіна, а жывы арганізм, які пастаянна ўдасканальваецца і развіваецца, – першага намесніка старшыні райвыканкама – начальніка ўпраўлення сельскай гаспадаркі і харчавання Івана Карнілу.
Намінацыя «Корань адзінства»
За лідарства, веру ў людзей і падтрымку кожнага прадпрыемства. За тое, што наш раён развіваецца, паляпшаецца – таму што ёсць чалавек, які аб’ядноўвае ўсе намаганні, слухае зямлю і чуе яе голас. Як знак прызнання, павагі і падзякі за рух наперад узнагародзілі старшыню Астравецкага райвыканама Сяргея Мядзвецкаса.
