Ко дню работников газовой промышленности: Ромуальд Войтехович – гордость Островецкого района
10:00 / 07.09.2025
Сярод такіх – слесар аварыйна-аднаўляльных работ Астравецкага раёна газазабеспячэння ВУ «Смаргоньгаз» Рамуальд Вайцяховіч, партрэт якога занесены на раённую Дошку гонару.
Пацікавіўся – узялі
Рамуальд Часлававіч памятае не толькі год, але і дзень, калі прыйшоў працаваць у райгаз, як тады называлася арганізацыя, – 8 лютага 2011 года. Даведаўся, што патрабуюцца рабочыя, і ўладкаваўся слесарам. І хоць адукацыя Вайцяховіча ні якім бокам не была звязана з паліўнай сферай, у райгазе ён прыжыўся.Ды чаму б і не, паціскае плячыма мужчына: работа спадабалася, да таго ж сам – хлопец мясцовы, добра ведаў у горадзе кожны дом і закуток. Пачынаў слесарам па абходзе: аглядаў вонкавыя, наземныя газапровады, правяраў іх на ўцечку газа.
– Што будзе складана працаваць, не маючы спецыяльнай адукацыі, не баяўся – галоўнае, каб было цікава, – зазначае мужчына. – Так і атрымалася: з задавальненнем пазнаваў нешта новае, вучыўся.
Напрацаваць вопыт
Майстэрству новаспечанага райгазаўца спачатку вучылі больш вопытныя калегі. Паказвалі, тлумачылі спецыфіку: самастойна па ўсіх гэтых ГРП (газарэгулятарны пункт) і ШРП (шкафны рэгулятарны пункт) паспрабуй разбярыся.Як выявіць і выправіць уцечку газа на ўводах, працаваць з падземным газапровадам, абслужыць кацёл ці калонку, наладзіць абсталяванне – шмат чаго даведаўся Рамуальд Часлававіч. А што не расказалі-паказалі – вывучыў.
Як толькі Вайцяховіч бліжэй пазнаёміўся з работай, яго накіравалі ў газінстытут у Гродна. Практыка, экзамены – атрымаў патрэбную кваліфікацыю. Праз 3-4 гады перайшоў слесарам па абслугоўванні газавыкарыстоўваючага абсталявання – катлоў, пліт, лічыльнікаў. А з 2016 года ён слесар аварыйнай службы.
«Пачуць уцечку можна «на нюх» – і я не жартую, – дзеліцца невялікім сакрэтам майстэрства слесар. – Але ў нас для гэтага ёсць спецыяльныя апараты. Напрыклад, «Лазар-міні» дазваляе, не заходзячы ў памяшканне, праверыць канцэнтрацыю газа, прычым «бярэ» з 30-ці метраў. Цяпер мы працуем з навейшым абсталяваннем».
З абходчыка да аварыйшчыка
Спадзяюся, не пакрыўджу іншых газавікоў, аднак упэўнена, што ў аварыйнай службе працуюць самыя вопытныя і надзейныя. Бо гэта работа – свайго роду абагульненне ўсяго таго, што ты даведаўся і вывучыў у «абходчыках» і слесарам па рамонце. Аварыйка займаецца ўсім – ад выпраўлення непаладак і ўцечак у дамах да прадухілення аварыйных сітуацый раённага маштабу.
Камандная работа
Самы важны інструмент, які заўсёды ў руках слесара аварыйкі – газааналізатар, які дапамае знайсці ўцечку. Прычым, удакладняе Рамуальд, прыборы існуюць розныя: асобна на звадкаваны газ, на прыродны і змешанага «тыпу» – у залежнасці ад устаноўленага катла.Экіпаж аварыйнай машыны – вадзіцель і слесар. На сур’ёзныя аварыйныя заяўкі разам з брыгадай выязджае майстар.
Некаторыя абаненты цікавяцца, што за камеры на форме аварыйшчыкаў. А гэта абавязковае патрабаванне, якое, да слова, дапамагае потым адсачыць, наколькі правільна яны выканалі сваю работу.
– Працую даўно, таму добрую палову абанентаў не толькі горада, але і раёна ведаю: якія могуць быць у іх праблемы і як іх вырашыць.
Пяць пытанняў аб галоўным
– У які час сутак вам больш падабаецца працаваць?– Днём больш выездаў, ноччу толькі аварыйныя сітуацыі здараюцца. І часцей зімой, калі моцна халадае. Але па вялікім рахунку – без розніцы: спаць усё роўна не маем права (Смяецца.)
– Чым займаецеся на базе?
– Чытаем, вучым тэорыю – сёння, каб быць прафесіяналам, гэта неабходна. Ды і экзамен потым здаваць…
– Ахарактарызуйце сваю работу.
– Вельмі адказная. І ў той жа час цікавая. Мне падабаецца пазнаваць новае, удасканальваць веды. З абанентамі шмат даводзіцца стасавацца.
– Што, на ваш погляд, важней для спецыяліста – тэорыя ці практыка?
– Тэорыя – гэта добра, але практыка лепш. Толькі так можна зафіксаваць веды, аттачыць майстэрства. І гэта пастаянны працэс: вучыцца-практыкавацца. Газавае абсталяванне абнаўляецца, удасканальваецца – адставаць нельга.
– Што змянілася за час вашай работы?
– Камп’ютарызацыя прыйшла – і многае пайшло па-іншаму. Новыя тэхналогіі, безумоўна, аблегчылі работу. Да прыкладу, аварыйныя заяўкі і дакументацыя ў планшэтах. Але ручную працу слесара яны не заменяць. А наконт абанентаў… Многія правялі прыродны газ – такіх спажыўцоў стала больш. Некаторыя ж пераходзяць на электрычнае ацяпленне – і выбываюць са спіса нашых кліентаў.
Адправіцца за 70 кіламетраў у далёкую вёску на выпраўленне непадалак з газам ці з дзясятак разоў выехаць на выклік у горадзе – Рамуальд Вайцяховіч прывык да такога распарадку працоўнай змены. Ён, як сапраўдны спецыяліст сваёй справы, едзе туды, дзе патрэбна дапамога. Бо ведае: ад яго прафесіяналізму, хуткасці, правільнасці дзеянняў залежыць беспека людзей. Галоўнае – паспець і выправіць «паломку».
Подписывайтесь на телеграм-канал «Островецкая правда» по короткой ссылке https://t.me/ostrovetsby.
Телеграм-канал «Островецкая правда» – всё самое интересное из жизни Островца и Островецкого района.
