Страда в совхозе «Подольский»: десикация посевов, новые комбайны, молодёжные и семейные экипажи

15:32 / 24.07.2025

Нават механізатары-аксакалы за плячамі якіх звыш 20-ці ўборак, не прыгадаюць такога ўскладненага надвор’ем жніва. Тым не менш хлебаробы не трацяць аптымізму і выкарыстоўваюць кожную пагодлівую хвіліну, каб зжаць саспелы ўраджай без страт. Тым больш што такую задачу на селектарай нарадзе паставіў Прэзідэнт Беларусі Аляксандр Лукашэнка.

Як наладжана ўборка ў РУП «Астравецкі саўгас «Падольскі», чаму сёлетняе жніво ў гэтай гаспадарцы можна назваць маладзёжным і сямейным, што хвалюе галоўнага агранома – пра гэта і іншае з першых вуснаў удзельнікаў уборачнай кампаніі даведаўся карэспандэнт «АП».

На календары 21 ліпеня. Планавала і загадзя за некалькі дзён дамаўлялася пра рэпартаж у КСУП «Гервяты», але давялося хутка мяняць планы і ехаць ў саўгас: збожжаўборачная звяно толькі гэтай гаспадаркі змагло выйсці ў поле. У астатніх КСУПах вялікагабарытныя хлебаўборачныя машыны пасля працяглых дажджоў загразалі…

Слова галоўнаму аграному

Дзмітрый Малючак:

– У верасні будзе 7 гадоў, як працую галоўным аграномам у саўгасе. З упэўненасцю магу сказаць, што сёлетняе жніво адно з самых непрадказальных, запозненых і напружаных. Пры такім надвор’і ёсць рызыка прарастання зерня ў коласе. Ловім не тое што пагодлівыя дні, а моманты. Па магчымасці нават на некалькі гадзін выязджаем убіраць.

Па вялікім рахунку цягнуць ужо няма куды: тэрміны падціскаюць. Як сказаў Прэзідэнт, збожжа трэба дапрацоўваць, каб яно не стаяла ў полі. На адным участку правялі дэсікацыю(*) пасеваў, каб можна было перакінуць тэхніку з азімага ячменю, уборка якога завяршаецца, на яравы.

Дарэчы, па ўраджайнасці гэтай культуры мы займаем другі радок у раённай зводцы пасля КСУП «Гудагай». На круг набіваем каля 45-ці цэнтнераў, а гэта на 5 больш чым летась.

Увогуле жніўны клін у нашай гаспадарцы адзін з самых невялікіх у раёне – 2 242 гектары, з якіх 1 800 – азімыя, як паказвае практыка, больш ураджайныя за яравыя. Ужо некалькі сезонаў запар пад будучы ўраджай стараемся больш шчыльна і плённа папрацаваць з восені. Летась на зіму пасеялі па 500 гектараў ячменю і пшаніцы, па 400 – трыцікале і жыта. Вясной прыгарнулі насенне ячменю на 192 гектарах, гароху – на 150, зернебабовых – на 250.

На жніве працуе 9 камбайнаў, 2 з якіх набылі сёлета па лініі Прамагралізінгу. На адвозе задзейнічана 5 адзінак (у тым ліку адзін прыватнік). Тэхнікі хапае, таму што за раз адна машына забірае збожжа ад 2-х камбайнаў. Услед запускаем прэсы – іх 3: пад сяўбу рапсу аператыўна вызваляем плошчы – не за гарамі пасяўная крыжакветкавага. Як і ў мінулым годзе, адвядзём пад яго 450 гектараў. На жаль, больш не можам, таму што не ўпішымся ў аптымальную структуру севазвароту. Дарэчы, рапс на полі выглядае нядрэнна – з улікам вясенніх прымаразкаў думаў, што будзе горшая сітуацыя…

...Што засмучае, акрамя надвор’я? Па ўсім бачна, што жніво сёлета будзе энергазатратнае. Што скінуць вільготнасць збожжа да 14-ці працэнтаў з 17-18, а што з 30-35, як цяпер, – розніца адчувальная. Напрыклад, партыю ў насенны фонд дапрацоўвалі суткі. Доўга, марудна, карпатліва – але нічога не зробіш: у такой сітуацыі тэмпературу варта выстаўляць не больш за 80 градусаў, інакш зародак зерня загіне. А вось фуражнае не такое далікатнае, можна яго дасушваць пры 100 і звыш градусах.
Для ўсіх задзейнічаных на ўборцы работнікаў арганізавана гарачае харчаванне, а таксама даведзены нормы аплаты.

Паралельна з уборкай працягваем 2-гі ўкос. Нарыхтоўваем сянажную масу ў плёнку, а таксама закладваем у тэхналагічныя ёмістасці для захоўвання травяністых кармоў. Засталося запоўніць толькі адну траншэю. Сілас выкарыстоўваем леташні – яго да новага года хопіць.

(*) Дэсікацыя – спецыяльны агратэхнічны прыём, які ўключае апрацоўку культур хімічнымі прэпаратамі (дэсікатамі) для паскарэння падсушвання раслін перад уборкай. Гэта дазваляе спрасціць працэс жніва, знізіць вільготнасць зерня і зменшыць рызыку страты ўраджая.

Слова хлебаробам

Дзмітрый Шэша:

– У пары з цесцем Міхаілам Козелам на жніве 18-ты сезон. Неаднойчы першымі ў гаспадарцы «бралі» жаданую тысячу тон, уваходзілі ў лік прызёраў раённага прафсаюзнага спаборніцтва сярод камбайнераў.

Для мяне гэта 22-я ўборка, і за апошнія гады не прыпомню такога мокрага лета. Да таго ж позна пачалі ўбіраць, таму, відаць, і тэрміны азімай сяўбы ссунуцца.

Час падціскае: няма калі стаяць, трэба малаціць. З азімага хутка пяройдзем на яравы ячмень. Яго, у адрозненне ад іншых каласавых культур, складана ўбіраць. Жатку апускаем ледзь не да самай зямлі – а так цяжэй ехаць, да таго ж, калі глеба мяккая, камбайн можа «сесці». Ячмень нізкі па сваёй прыродзе, кладзецца. Сёлета вільгаці шмат, таму расліны дастаткова высокія – хоць з гэтым пашанцавала.

На пачатак дня намалот быў 193 тоны, за сёння гэта ўжо 5-ты бункер, таму маем 315 тон. У мяне два памочнікі: цесць і сын. Арцём ужо студэнт, таму падмяняе дзядулю.

Нашаму КЗС-1218 12 гадоў: не самы ўзроставы камбайн, але найбольш мотагадзін ад’ездзіў. Некаторыя хлопцы на новых «Палессях» працуюць. Неістотна, колькі гадоў хлебаўборачнай машыне, галоўнае – глядзець яе, свочасова рамантаваць і абслугоўваць.

Рамуальд Журэйка:

– Трава, сена, салома – кручу, у тым ліку ў плёнку, у саўгасе ўсё. У мінулыя сезоны намотваў да 500 «шпулек» саломы, у гэтым – пакуль 200.

На прэс-падборшчыку «Фьюжэн» другі сезон. Ведаеце, тут, як і пры кіраванні любой сельгастэхнікай, павінна быць сваё майстэрства, якое адточваецца на практыцы. Унікаў у асаблівасці работы гэтага прычапнога агрэгата, кансультаваўся з пастаўшчыкамі – цяпер скажу са стопрацэнтнай дакладнасцю: лепшага прэс-падборшчыка не знайсці. Але каб кагосьці навучыць на ім працаваць, мне спатрэбіцца не адзін дзень – шмат нюансаў. Пытаеце, колькі гадоў на жніве? Скажу так: амаль два гады як на пенсіі працую, а ў сельскай гаспадарцы я з 1987 года. Вядома, што і дома спраў хапае, як і паўсюль на вёсцы, але без зямлі і тэхнікі не магу.

Я на рабоце душой адпачываю. Вам любы хлебароб скажа: калі выдатная тэхніка, механізатар не стамляецца!

Дзяніс Фалькевіч (на фота ўверсе разам з братам):

– Сёлета з братам на жніве ў пары: ад сельгастэхнікі дапамагаем саўгасу ўбіраць ураджай. Для мяне ў якасці старшага камбайнера гэта 2-е жніво, а так 5-я ўборка. Мы хлопцы вясковыя, з Маляў. Тата некалі хоць і працаваў у калгасе, але механізатарам не быў. А я мэтанакіравана абраў гэтую справу і Влада падбіў адвучыцца на трактарыста. (З усмешкай паглядзеў на брата. – Заўв. аўт.) Ён не пашкадаваў: у нас абодвух душа да гэтага ляжыць. А калі ўсё атрымліваецца, то ўдвая прыемней.

Кірыл Старасцін:

– Гэта першае самастойнае жніво ў маім жыцці, таму крыху хвалююся, хоць і ведаю, што пры патрэбе дапамогуць старэйшыя калегі. Летась быў памочнікам у Аляксандра Казлоўскага, таму ўся адказнасць была на старшым камбайнеры.

На Астравеччыну ў вёску Літвяны пераехаў з бацькамі са Случчыны некалькі гадоў назад. Палюбілі гэтыя мясціны. Мэтанакіравана адвучыўся ў Ашмянах на трактарыста і прыйшоў на работу ў саўгас, тут і збіраюся заставацца. Механізатарская справа мне па душы, а ў жніва свая асаблівая рамантыка!

Аляксандр Шостак:

– Для мяне гэтае жніво – 16-е ў якасці камбайнера. З 2002-га па 2011 год у мяне была «Ліда», потым – КЗС, а цяпер новае «Палессе» – толькі сёлета камбайн купілі. Яшчэ ў школе 4 гады падпрацоўваў памочнікам, тады дазвалялася. Добра, што гэта вярнулі і хлопцы могуць атрымліваць адпаведную катэгорыю з 17-ці гадоў. З сынам убіраем ураджай. А каго яшчэ шукаць буду ў памочнікі? (Усміхаецца.)

Яўген Крывіцкі:

– Хоць працую ў раёне электрычных сетак, механізатарскую справу добра ведаю і больш таго – люблю. Гэта ж мая родная зямля, гаспадарка – як не дамагчы прыбраць ураджай? Для мяне гэтая ўборка – 10-я. З напарнікам Ільёй Скуратам (ён выратавальнік, але таксама, як і я, мясцовы) толькі выйшлі ў поле. Хлопцы кажуць, што буксуюць – дый гэта не дзіва пасля такіх дажджоў. Разлічваем на добры ўраджай. Павінны тысячу тон узяць, без яе і жніво – не жніво!