Чым могуць ганарыцца грамадзяне Беларусі , спыталі ў астраўчан

11:00 / 03.07.2025

Якімі дасягненнямі могуць ганарыцца незалежная Беларусь і яе грамадзяне? З гэтым пытаннем мы звярнуліся да жыхароў Астравеччыны напярэдадні Дня Незалежнасці.

Жанна Волк-Леановіч, урач лячэбнай фізкультуры ЦРКБ:

– На першае месца я паставіла б вялікагрузныя самазвалы «БелАЗ» – самыя магутныя ў свеце. У мінулым годзе пашчасціла пабываць на экскурсіі ў Жодзіна на аўтазаводзе, дзе іх выпускаюць. Сказаць, што была ўражана, – нічога не сказаць. Уявіце сабе машыну, у кузаў якой можна загрузіць 450 тон. У яе кабіне можна адзначаць святы, а каб паглядзець у правае люстэрка, трэба мець вельмі добры зрок. Ці прабегчы па кабіне некалькі метраў.

Лічу, што мы можам ганарыцца і нашай малочнай прадукцыяй, вельмі якаснай і смачнай, якая карыстаецца папулярнасцю не толькі ў нашай краіне, але і за мяжой.

І, безумоўна, лён – гэта брэнд нашай краіны. У свой час льняную вытворчасць ледзь не загубілі, а цяпер яна на ўздыме. І, мне здаецца, льняныя тканіны і вырабы з іх – лёгкія, прыгожыя, натуральныя – ніколі не выйдуць з моды.

Уладзімір Булавіцкі, пенсіянер:

– Галоўным дасягненнем нашай краіны за гады незалежнасці лічу ўпэўнены курс яе кіраўніцтва на захаванне суверэнітэту, цвёрдую палітыку па падтрыманні міру.

Калі гаварыць пра канкрэтныя дасягненні, то нельга не ўзгадаць мірны атам: Беларусь пабудавала атамную электрастанцыю. Для астраўчан асаблівы гонар, што першынец ядзернай энергетыкі размешчаны на тэрыторыі Астравеччыны і яго будаўніцтва прынесла шмат прэферэнцый нашаму раёну.

Хачу адзначыць і ўкараненне новых тэхналогій у сельскай гаспадарцы, якія дазволілі вывесці гэтую галіну на новы ўзровень.

Ева Шырынская, вучаніца СШ №1:

– За гады сваёй незалежнасці Беларусь назапасіла нямала дасягненняў у розных галінах – адукацыі, медыцыне, спорце, культуры – якімі можна ганарыцца. Нашу краіну ведаюць у свеце па дасягненнях беларускіх спартсменаў, да нас едуць, каб палюбавацца культурнай і гістарычнай спадчынай. А шматлікія замкі і палацы, якія цяпер прыцягваюць турыстаў сваёй веліччу і прыгажосцю, адроджаны ў апошнія гады дзякуючы дзяржаўнай падтрымцы.

Уладзімір Крывец, настаўнік СШ №3:

– За 30 гадоў незалежнасці Беларусь набыла ўсё, што патрэбна чалавеку для жыцця і развіцця. Мяркую па сабе: у мяне любімая работа, а працягваю вучыцца – на днях атрымаў дыплом Акадэміі кіравання пры Прэзідэнце. Гадую дзяцей і будую дом. Што яшчэ трэба?

Як настаўнік магу сцвярджаць, што адным з галоўных дасягненняў нашай суверэннай дзяржавы з’яўляецца сістэма адукацыі. Па дадзеных незалежных экспертаў, наша краіна па ўзроўню IQ займае 16-е месца са 126 краін. Гэта азначае, што мы не толькі захавалі тое лепшае, што было ў савецкай сістэме адукацыі, але і ўносім сучасныя карэкціроўкі для канкурэнтаздольнасці нашых людзей на рынку працы.

Аляксандр Юргелянец, загадчык Рытанскага сельскага клуба:

– Галоўнае дасягненне незалежнай Беларусі – тое, што мы жывём у мірнай краіне, маем магчымасць спакойна расціць хлеб, выхоўваць дзяцей, спяваць песні. Мы не баімся за сябе, за будучыню дзяцей і ўнукаў, нашы сыны не гінуць на вайне. І за ўсё гэта трэба сказаць дзякуй нашаму Прэзідэнту Аляксандру Рыгоравічу Лукашэнку.

Аляксандр Івашка, выпускнік гімназіі №1:

– Галоўным дасягненнем лічу тое, што Беларусь стала касмічнай дзяржавай. Наша краіна паспяхова запускае на арбіту штучныя спадарожнікі, рыхтуе новых касманаўтаў і актыўна ўдзельнічае ў міжнародных касмічных праграмах.

Аб тым, што Беларусь – паўнавартасная касмічная дзяржава, сведчыць і палёт карабля «Саюз МС-25» да МКС з беларускай Марынай Васілеўскай і ўраджэнцам нашай краіны Алегам Навіцкім на борце.