Аматарскае аб’яднанне Міхалішкаўскага клуба ўдзельнічае ў абласным аглядзе-конкурсе з велікоднай замалёўкай

14:00 / 08.06.2025

З 2023 года дзейнічае ў Міхалішкаўскім клубе аматарскае аб’яднанне «Вытокі» і ўжо спрабуе скараць вяршыні абласных творчых спаборніцтваў. Зараз, напрыклад, яно змагаецца з калегамі па інтарэсах у аглядзе-конкурсе «Свет захапленняў».

– Мы прадстаўляем замалёўку велікоднага абрада «Валачобнікі спяваюць, шчасця, радасці жадаюць». Спачатку быў завочны этап, на які адпраўлялі відэазапіс – рабілі яго як раз на Вялікдзень. Потым да нас прыязджала намеснік дырэктара абласнога метадычнага цэнтра народнай творчасці Наталля Рамановіч і ацэньвала ўжывую, – расказала кіраўнік аб’яднання Марыя Вайцяховіч. – Калі выбіралі тэму, арыентаваліся на каляндар: Каляды ўжо не пакажам, Купалле яшчэ не зробім. Да таго ж з самага пачатку існавання «Вытокаў» трымаемся традыцыі хадзіць у жакі на Вялікдзень.

Увогуле аматарскае аб’яднанне, у склад якога ўваходзяць мясцовыя дзеці, накіравана на тое, каб успомніць, адрадзіць і захаваць народныя абрады і звычаі. Кіраўнік ставіць мэтай паказаць маладому пакаленню, якія святочныя традыцыі былі раней, што з іх працягваецца і можна вярнуць.

– Шмат хто з дзяцей ці не ведае такога, ці чулі, але не бачылі на справе. Часцей яны ідуць па яйкі са словамі «Хрыстос уваскрос!» – і ўсё на гэтым. А ёсць жа песні, вершы, – дзеліцца Марыя. – У аб’яднанні юныя жыхары Міхалішак удзельнічаюць у абрадах асабіста.

– У конкурсным нумары паспрабавалі праз гульні, песні і танцы перадаць атмасферу святкавання Вялікадня. Матэрыял збіралі з розных крыніц. За аснову ўзялі ўспаміны майго прадзядулі; песні і вершы бралі са старых кніжак у бібліятэцы; штосьці шукалі ў інтэрнэце. Ну а побытавыя танцы ойра, кракавяк, мутусікі ведалі, – дадае дзяўчына. – Прыемна, што пасля прэзентацыі, якая адбылася ў хаце маёй бабулі, выхаванцы падыходзілі і дзякавалі за запрашэнне паўдзельнічаць у пастаноўцы. Бачна: ім спадабалася!

#нашалепшае

Фота Аксаны САВІЦКАЙ.

Відэа Аксаны САВІЦКАЙ і Марыі ВАЙЦЯХОВІЧ.