Пра вясеннія гаспадарчыя клопаты расказалі жыхары Астравеччыны

15:00 / 18.03.2025

Ці пабольшала спраў з надыходам вясны і якія гаспадарскія клопаты выйшлі на першы план, карэспандэнт распытаў у жыхароў Астравеччыны.

Віктар Драцкі, аг. Малі:

– Прыйшла вясна, а з ёй і сезонныя клопаты пачаліся.

На працы вось шчыруем: тэрыторыю падсвяжылі, жанчыны ў клумбах парадкуюцца, я за газон і смецце адказны.

Ля хаты спраў заўсёды хапае: то адно корпаеш, то другое – у прыватным доме работы хоць адбаўляй і жанчыне, і мужчыне. Кусты-дрэвы яшчэ зімой паабразаў, што там чакаць да вясны, калі надвор’е спрыяла!

Вясна – гэта своеасаблівая падрыхтоўка да лета: жонка ўжо пасеяла на расаду перцы і памідоры.

Вераніка Лазко, аг. Варняны:

– Як толькі на вуліцы цяплее, адразу клопаты хатнія адыходзяць на другі план. Хочацца корпацца на дварэ, наводзячы парадкі: лішні раз венікам па дарожках прайсціся, клумбы праверыць, ці не вымерзла што; зямельку паварушыць, траву граблямі «прычасаць», каб свяжэй выглядала.

З мужам абглядаем, як кусты-дрэвы перазімавалі, якім трэба «стрыжку» зрабіць. Прыдумваем, чым двор аздобіць, што дзе перамайстраваць. Звычайна я ідэі накідваю, а муж увасабляе іх у жыццё – за такую падтрымку яму вельмі ўдзячна.

А паветра вясенняе як па-асабліваму пахне! Часам выйду на ганак, заплюшчу вочы і проста стаю і дыхаю. (Усміхаецца.)

Ніна Александровіч, г. Астравец:

– Гаспадарчы сезон на зямлі ўжо распачала. Жыву ў кватэры, але маю дачу ў Ашмянскім раёне. Ужо ездзілі туды з маці і цёткай. У хаце пакуль не парадкаваліся, і вокны не мылі – трэба пачакаць, пакуль пацяплее.

Парадкі ў двары і вакол яго навялі, сучча абламанае прыбралі. Клумбы «праінспекціравалі» – не вымерзлі за зіму, дарэчы, пралескі ўжо зацвілі. Ружы вырашылі не спяшацца раскрываць – ці мала якія прымаразкі.

Расадай мама займаецца – на ўсіх траіх садзіць. На бліжэйшую перспектыву запланавалі падмуроўку пафарбаваць, дровы пасекчы і скласці… – словам, сезон дачных выхадных у нашай сям’і адкрыты. (Усміхаецца.)

Валянціна Лось, аг. Варняны:

– Абуджаецца прырода, абуджаецца з ёй і чалавек. (Усміхаецца.)

Ужо ля хаты крыху прыпарадкаваліся: прыбралі смецце, што пасля зімы сабралася (добра, у нас яго вывозяць цэнтралізавана). А такое, як галінкі дрэў, абрэзанае кустоўе, палім, але тады ўжо ні на хвіліначку не адыдзеш – трэба за вогнішчам пільна сачыць, каб бяды н нарабіць.

Траўку паграбілі. Дровы нядаўна прывезлі, трэба пілаваць… Агарод на зіму зааралі – цяпер толькі дачакаць, калі час надыдзе засаджваць.

Асаблівых спраў пакуль не развядзеш – яшчэ холадна і зямля мокрая, тым больш прагноз абяцае пахаладанне.

Марыя Бабойць, г. Астравец:

– Агародаў ужо не саджу, толькі кветкі. Клумбы-то яшчэ не парадкавала – рана. А вось падмесці-падгрэбсці, дзе якое дробнае смецце падабраць – гэта, канешне, прыемна ж, як парадак вакол.

Сонейка выглянула, прыгрэла – і ў хаце ўжо не ўседзець, хочацца выйсці паветрам свежым падыхаць.

З надыходам вясны і ўнутрана па-іншаму сябе адчуваеш, дзень павялічваецца, сонечнага святла больш – настрой весялейшы становіцца. (Усміхаецца.)