Раённая бібліятэка атрымала Дыплом І ступені за перамогу ў рэспубліканскім конкурсе
«Астравецкая праўда» ўжо паведамляла ў нумары за 16 чэрвеня, што раённая бібліятэка стала пераможцам ХХХІ Рэспубліканскага конкурсу “Бібліятэка – асяродак нацыянальнай культуры” ў намінацыі “За падтрымку і папулярызацыю чытання”.
А напярэдадні свайго прафесійнага свята – Дня бібліятэк – на ўрачыстым пасяджэнні, якое прайшло ў Нацыянальнай бібліятэцы, адбылося ўзнагароджанне пераможцаў. Дыплом І ступені дырэктару ўстановы Наталлі Ачарэтавай уручыў першы намеснік міністра культуры Валерый Грамада са словамі шчырай падзякі за добрасумленную працу астравецкіх бібліятэкараў.
Грашовую прэмію, якая стала важкім, карысным і прыемным дадаткам да дыплома, раённыя бібліятэкары накіравалі на ўмацаванне матэрыяльна-тэхнічнай базы.
Вольга ЗАЯНЧКОЎСКАЯ,
бібліятэкар.