Жніво-2023: хто і што будзе ўбіраць і падарункі прымаць
09:15 / 18.07.2023
– Аграрыям раёна трэба абмалаціць амаль 15 тысяч гектараў збожжавых і зернебабовых, гэта без уліку кукурузы, грэчкі і проса, 3 020 гектараў рапсу. Найбольшы збожжавы жніўны клін у КСУП «Гервяты» (3 915 гектараў), найменшы – у КСУП «Варняны» (2 463).
Азімы ячмень, пад які ў раёне адведзена 410 гектараў, зжалі ўсе гаспадаркі. Валавы намалот пры сярэдняй ураджайнасці 31,6 цэнтнера з гектара (летась – 50 ц/га) склаў 1 300 тон. Найлепш гэтая культура сыпалася ў КСУП «Гервяты»: на круг камбайнеры намалочвалі каля 50 цэнтнераў.
Рабіць прагнозы на ўраджай – справа няўдзячная, але ўжо зараз можна смела казаць, што ён будзе значна горшым, чым летась. У апошнія два месяцы вільгаці не хапала катастрафічна. Задача нумар адзін – у аптымальныя тэрміны, а галоўнае – без страт убраць ураджай. Упэўнены, што нашы хлебаробы справяцца.
– Не толькі ў нашым раёне, але і ва ўсёй краіне існуе цудоўная традыцыя ўшанавання так званых тысячнікаў: камбайнераў і іх памочнікаў, вадзіцеляў, аператараў зернесушыльных установак. Распрацавана палажэнне аб арганізацыі раённага прафсаюзнага спаборніцтва на ўборцы збожжавых і зернебабовых культур у 2023 годзе і падвядзенні яго вынікаў. З пачаткам масавага жніва райкам улічвае вынік кожнага ўдзельніка ўборачнай кампаніі – звесткі пра перадавікоў можна будзе знайсці на нашым сайце.
Пры падвядзенні вынікаў будзем улічваць і збожжа, і рапс. Узнагароджваць лідараў будзем непасрэдна ў дзень дасягнення імі пераможнага выніку.
Райкам адзначыць тры першых экіпажы камбайнераў, якія намалоцяць тысячу тон – незалежна ад прапускной здольнасці хлебаўборачных машын. Падзяку і грашовую прэмію атрымае адзін маладзёжны экіпаж.
Некалькі гадоў назад сярод вадзіцеляў мы вырашылі размежаваць намінацыі. Згадзіцеся, невялікаму «газончыку» немагчыма дужацца з габарытным МАЗам, які цягне за сабой 2 прычэпы. Сёлета адзначым трох першых вадзіцеляў-«тысячнікаў», якія працуюць на аўтамабілі з грузападымальнасцю звыш 5-ці тысяч тон, і першага вадзіцеля аўтамабіля з грузападымальнасцю да 5-ці тон. Ушанаваны будзе і адзін малады вадзіцель.
Пераможцамі будуць прызнаны 3 брыгады машыністаў зернесушыльных комплексаў, якія першымі ў раёне давядуць да патрэбнай кандыцыі дзве і больш тысяч тон.
Будзе адзначаны галоўны аграном ці адказны за ўборку гаспадаркі, якая першай перасягне тысячны намалот, а таксама намеснік дырэктара па ідэалагічнай рабоце – за лепшую інфармацыйную работу пра ход уборачнай кампаніі і яе лідараў.
Адзначу, што ва ўсіх гаспадарках для занятых на жніве працаўнікоў будзе арганізавана двухразовае гарачае харчаванне і выдадзена спецадзенне.
– На 13 ліпеня гатоўнасць збожжаўборачнай тэхнікі 100%. Са станоўчага боку адзначу ўсе сельгаспрадпрыемствы раёна. Хоць эканамічнае становішча КСУПаў адрозніваецца, тым не менш ва ўсіх гаспадарках адказна падышлі да падрыхтоўкі хлебаўборачных агрэгатаў да жніва. Запчасткі набывалі і за ўласныя сродкі, і за кошт рэспубліканскіх, абласных і раённых субсідый. Няма вялікіх пытанняў і па гатоўнасці зернесушыльных комплексаў.
Напачатку масавай уборкі два камбайны атрымаў КСУП «Гервяты». Па адной новай хлебаўборачнай машыне павінна з’явіцца ў КСУП «Варняны» і «Міхалішкі».
На жніве будзе задзейнічана крыху больш за 50 камбайнаў, прыблізна столькі ж адзінак тэхнікі – на адвозе зерня.
На палях раёна будуць працаваць работнікі і тэхніка многіх арганізацый і прадпрыемстваў раёна: 17 механізатараў; 5 трактараў, 13 грузавых аўтамабіляў. Па традыцыі дапамогуць у гэтую адказную пару сельгастэхніка, лясгас, жыллёва-камунальная гаспадарка, РАУС, РАНС, БелАЭС, аўтапарк №4, Смаргонскі філіял Гродзенскага райспажыўтаварыства.
У тэхнікі ёсць уласцівасць ламацца, але, спадзяюся, прастояў не будзе – усе праблемныя моманты мы пастараліся загадзя закрыць.
