Святочны настрой
08:39 / 22.01.2023
Гасцей шаноўнага ўзросту сардэчна прывіталі старшыня раённай ветэранскай арганізацыі Ірына Шляхтун і дырэктар цэнтра Святлана Куцько. Іх шчырыя, сардэчныя словы запалі ў нашы душы.
Сэнс акцыі ў цесных сувязях старэйшага і маладога пакаленняў. Таму на свята прыбыў дзіцячы музычны калектыў сярэдняй школы №3 з падарункамі: літаратурным прадстаўленнем, танцавальнай кампазіцыяй ды вядомай і любімай «Кацюшай», якую спявалі ўсе разам. Маладыя артысты з Альхоўскага дома культуры Алег і Яўгенія Уласікі таксама прыехалі з песнямі.
Не засталіся толькі ўдзячнымі слухачамі і героі дня – пенсіянеры. Вяночкам папулярных мелодый маладосці парадавалі альхоўскія «Анюціны вочкі» і астравецкія «Аксаміткі». Напрыканцы канцэрта прыпаднёс музычны сюрпрыз кіраўнік апошняга калектыву Васіль Карпец. А яшчэ ўсіх ад душы павесяліла Цыганка – супрацоўніца цэнтра Ірына Юковіч.
Потым былі танцавальнае і песеннае караоке. Усіх сагравала не толькі цёплая святочная атмасфера, але і духмяная гарбата з рознай слодыччу.
Фота Дзмітрыя Качана.
