Эксперымент па навядзенні парадку на зямлі пачнецца ў Рытанскім сельсавеце
09:46 / 16.01.2018
Увага і клопат патрэбны ўсім. Ды толькі зрабіць так, каб усе і ўсім былі задаволены, складана. Як з такой задачай спраўляецца сельвыканкам, мы пацікавіліся ў Рыгора Часлававіча Цэйкі.
– Добра, калі прадстаўнікі ўлады і насельніцтва гавораць на адной мове – тады і праблемы вырашаюцца хутчэй. Канешне, трэба і самім быць у курсе ўсіх падзей – і па меры магчымасцей дапамагаць людзям у іх справах.
У мінулым годзе мы шмат увагі ўдзялялі навядзенню парадку на зямлі: знеслі 10 дамоў і фундаментаў, добраўпарадкавалі тэрыторыі і перадалі землі ў сельгасзварот. Плануем добраўпарадкаваць яшчэ чатыры такія ўчасткі.
Шмат увагі ўдзялілі добраўпарадкаванню тэрыторыі ў вёсцы Паляны. Тут на плошчы амаль у 8 гектараў быў стары сад. Зрэзалі дрэвы, выкарчавалі пні, прыбралі старыя фундаменты, зрабілі планіроўку, а вызваленыя землі перадалі ў саўгас «Падольскі». Такія ж работы былі праведзены ў вёсцы Некрашуны.
Займаліся і аварыйнымі дрэвамі: прыбралі іх у Кямелішках, на мясцовых могілках, а таксама у вёсцы Літвяны.
Працавалі з несанкцыянаванымі звалкамі. Даўно заўважыў: як толькі хтосьці выкіне смецце – праз некалькі дзён на гэтым месцы ўтвараецца куча смецця. Сёлета такія звалкі прыбралі ва ўсіх нашых аграгарадках, а таксама ў Белай Вадзе.
На парадку дня – пытанні па добраўпарадкаванні дарог: падсыпалі пад’езд да вёскі Сціпіны, па хадатайніцтву сельвыканкама заасфальтавана дарога да аграгарадка Падольцы і вёскі Паляны, добраўпарадкаваны пад’езд да Кямелішкаўскай амбулаторыі.
Планаў па добраўпарадкаванні шмат. Хочацца пафарбаваць агароджы ў Кямелішках і Падольцах, заасфальтаваць участак дарогі ад Нікрашун да Рытані і ад Вароны да маста праз Вілію ў бок Літвян, падсыпаць вуліцы ў аграгарадках, прафіліраваць дарожнае пакрыццё.
Самым чаканым момантам гэтага года, мяркую, стане арганізацыя на тэрыторыі нашага сельсавета эксперыментальнага ўчастка ЖКГ, спецыялісты якога будуць аказваць насельніцтву паслугі па вывазу смецця, пакосу травы і іншых работах.
Навядзенне парадку на зямлі – адна з тых задач, вырашыць якую можна толькі разам з насельніцтвам. І цудоўна, што людзі разумеюць важнасць сумеснай працы.
Сёння ў склад Рытанскага сельскага Савета ўваходзіць
81 населены пункт, у 10 з іх не зарэгістравана ні аднаго чалавека.
Усяго на тэрыторыі сельсавета пражывае 2 034 жыхары,
большасць – у аграгарадках Кямелішкі, Падольцы, Рытань.
