Тры медалі прывезлі астравецкія баксёры з Полацка
Юныя астраўчане заваявалі 3 медалі на міжнародным турніры па боксе памяці майстра спорту СССР Уладзіміра Несцерава.
Спаборніцтвы праходзілі ў Полацку і сабралі баксёраў з розных рэгіёнаў Беларусі і Расіі. Прадэманстравалі на рынгу навыкі бою і выхаванцы Астравецкай спецыялізаванай дзіцяча-юнацкай школы алімпійскага рэзерву.
На “выдатна” правялі баі Цімур Сянкевіч (вагавая катэгорыя 54 кілаграмы) і Павел Мацкевіч (52 кілаграмы) Хлопцы ўпэўнена выконвалі прыёмы правай і левай рукой – і іх сапернікам нічога не засталося, як прызнаць паражэнне. У выніку Цімур і Павел сталі пераможцамі.
Упершыню выступаў на турніры такога ўзроўню Ігнат Канстантовіч (42 кілаграмы). Але першы блін быў не комам: астраўчанін правёў добры паядынак, заваяваўшы бронзавы медаль.
Стойка трымаўся на рынгу Ілля Чункевіч (60 кілаграмаў), але сапернік, якому давялося добра папацець, усё ж аказаўся мацнейшым.