Состоялась встреча профсоюзных лидеров сельскохозяйственных предприятий и организаций
Нядаўна ў раёне адбылося чарговае выязное пасяджэнне прэзідыума райкама прафсаюза работнікаў аграпрамысловага комплексу.Базавай арганізацыяй для рабочай сустрэчы прафсаюзных лідараў сельскагаспадарчых прадпрыемстваў і абслугоўваючых іх арганізацый на гэты раз стала МПМК-158, спецыялісты якой на чале з начальнікам Д.Л. Міжыгурскім у рабоце прэзідыума прынялі самы актыўны ўдзел, расказалі пра сваю будаўнічую арганізацыю і адказалі на шматлікія пытанні гасцей. Кола пытанняў, якія ім задавалі актывісты, закранала як непасрэдна прафсаюзную тэматыку (заработную плату, умовы калектыўнага дагавору, адносіны паміж адміністрацыяй і прафсаюзнай арганізацыяй, стан аховы працы, метады аказання сацыяльнай падтрымкі і заахвочвання работнікаў, забяспечанасць сродкамі індывідуальнай аховы і спецадзеннем і г.д.), так і агульнавытворчую сферу.
Так, у прыватнасці, Дзмітрый Леанідавіч Міжыгурскі расказваў аб асаблівасцях эканамічнай сітуацыі прадпрыемства і шляхах яе паляпшэння, ступені аднаўлення тэхнічных сродкаў, аб аб’ёмах выконваемых работ і праблемах, звязаных з іх пошукамі, аб недахопе рабочых высокіх кваліфікацый, аб сістэме павышэння кваліфікацыйных разрадаў, якая дзейнічае ў МПМК-158, і аб многім іншым.
Гідам у падарожжы па базе прадпрыемства стаў сам яе начальнік – госці змаглі азнаёміцца з работай растворнага вузла, дрэваапрацоўчага цэха, пабываць у гаражах і адміністрацыйным будынку.
А вось экскурсію “на выезде” ўзначаліла старшыня прафкама работнікаў МПМК -158 Ірына Іванаўна Лаўрыновіч – з яе дапамогай удзельнікі выязнога пасяджэння азнаёміліся з працэсам будаўніцтва так званых “прэзідэнцкіх” домікаў, пачынаючы з нулявой фазы (у Варнянах) і заканчваючы станам “пад ключ” (у Міхалішках).
Лідараў прафсаюза асабліва ўразілі дамы, у якіх будаўніцтва завершана – у іх поўнасцю паклеены сцены, пафарбаваны падлога і столь, праведзена газавае ацяпленне, каналізацыя, устаноўлены ўсё бытавое і санітарнае абсталяванне, нават выведзены званок на ўваходныя дзверы і прымацаваны знешні ліхтар для асвятлення веранды – занось рэчы і жыві!
Хаця да якасці работы будаўнікоў нямала прэтэнзій – старшыні прафсаюзаў сельскагаспадарчых арганізацый пастараліся данесці іх да непасрэдных вытворцаў.
Праблемы будаўніцтва абмяркоўваліся ў прафсаюзным асяроддзі і пасля таго, як яго актывісты пакінулі будаўнічую пляцоўку. Але на чарзе іх чакалі надзённыя праблемы прафсаюзнага жыцця, і пад кіраўніцтвам старшыні райкама прафсаюза Мікалая Канстанцінавіча Грыцкевіча яны перайшлі да абмеркавання пытанняў, заяўленых у парадку дня прэзідыума. Па выніках была прынята пастанова.
______________________
Ганна ЧАКУР.
Фота Аляксандра ЮШЧУКА.
