Началась уборка рапса
14:00 / 22.07.2013
Волаты-камбайны, пакінуўшы цесныя стойлы, вырваліся нарэшце на волю – загрукаталі, заматавіліліся, угрызліся прагнымі жаткамі ў духмяную спеласць шматгадовых траў. І першыя тоны насення купоўкі, райграсу ды цімафееўкі напоўнілі бункеры.
А потым азімы рапс у вітальным жэсце падняў угору свае стручкі-пальцы, і эпіцэнтр уборкі-2013 змяніў дыслакацыю – надышоў зоркавы час крыжакветнага. І цяпер усе шляхі вядуць да яго – не горш за кравецкі чаўнок сноўдаюць па кучаравай раскошы рапсавага поля старанныя камбайны, пакідаючы пасля сябе толькі вастраносыя “пянькі”. А за імі ўважліва назіраюць магутныя МАЗы, каб у час падставіць паслужлівы кузаў пад цёмную лавіну саспелых гарошынак. І загула, разагрэлася сушыльная гаспадарка – першыя партыі азімага рапсу ўжо даведзены да кандыцыйнай вільгаці…
Па стану на 18 ліпеня ў гаспадарках раёна абмалочана 179 гектараў насеннікаў шматгадовых траў (37 працэнтаў ад іх наяўнасці). Ураджайнасць складае 5,6 цэнтнера з гектара.
Уборачная плошча азімага рапсу – 1903 гектары. Ураджай сабраны з 288 гектараў. Намалочана 804 тоны насення. Сярэдняя ўраджайнасць складае 27,9 цэнтнера з гектара.
Самыя высокія тэмпы на ўборцы крыжакветнага пакуль дэманструюць жнеяры СВК “Варняны” – у гаспадарцы абмалочана 95 гектараў рапсу, кожны з якіх даў на круг па 31,8 цэнтнера насення. Па стану на 18 ліпеня гэта рэкордны па ўраджайнасці паказчык. Другую пазіцыю ў гэтым сэнсе трымае СВК “Гервяты” – 26,7, трэцюю – СВК “Міхалішкі” – 26,3, чацвёртую – СВК “Гудагай” – 25,3, пятую – саўгас “Падольскі” – 25,0 цэнтнера з гектара.
План ўборкі збожжавых і зернебабовых сёлета складае 19605 гектараў (без кукурузы на зерне і рапсу). На жніве будуць задзейнічаны 93 камбайны – 88 агрэгатаў адрамантаваны, яшчэ пяць паступяць у гаспадаркі бліжэйшыя дні.
Сярэдняя нагрузка на камбайн складае 224 гектары. Гэта значыць, што пры спрыяльных кліматычных умовах ёсць шанс правесці абмалот збожжавых і зернебабовых палеткаў за 15–18 дзён.
На старце жніва пажадайма земляробам важкага коласу, надзейнай тэхнікі, добрага надвор’я і нястомнасці!
____________________
Ганна ЧАКУР.
Фота аўтара.