Як хлопчыку пашпарт рабілі
11:55 / 15.02.2018
– Трэба нашаму хлопчыку пашпарт зрабіць. Мы за мяжу едзем, а без пашпарта туды не пусцяць, – выказалі дзяўчаты сваю просьбу.
– Усё зразумела. Сфатаграфуйце свайго хлопчыка... – пачынае начальнік.
Але яго тут жа перабіваюць.
– Мы ўжо сфатаграфавалі…
– Аплаціце квітанцыю…
– Ужо аплацілі…
– Ну і добра. Давайце тады пасведчанне аб нараджэнні і…
– Якое пасведчанне аб нараджэнні? – недаўменна пазіраюць на начальніка пашпартнага стала дзяўчаты. – У нас толькі фотаздымак і даведка аб прышчэпках.
На гэты раз недаўменне чыталася ўжо на твары начальніка:
– Каму вы хочаце пашпарт зрабіць?
– Хлопчыку нашаму, кокер-спаніелю, – сур’ёзна адказваюць дзяўчаты.
– Дык вам не да нас, а ў аддзел жыллёва-камунальнай гаспадаркі, – зразумеўшы, у чым справа і якому хлопчыку неабходна зрабіць пашпарт, ледзь стрымліваючыся ад смеху, адказвае начальнік.
Леся ВЕЦЯРОК.