Справы астраўчан у выхадны дзень
10:46 / 22.12.2017
Дзяніс Калінін, машыніст-абходчык па турбіннаму абсталяванню:
– Калі прачнуся раней, то стараюся трапіць на рынак – што-небудзь закупіць і прыгатаваць смачненькае. Калі ж жонкі няма – яна ў мяне студэнтка – то сплю доўга і вечар заканчваю праглядам серыялаў або паходам у кіно, бо заняцца больш няма чым.
Людміла Сівец, прадавец (без фота):
– У нядзелю я звычайна працую. Калі выпадае выхадны, то стараюся пабыць з мужам, дзецьмі. Любімы занятак зімой на выхадных – катацца з дзецьмі на санках. Сёлета снегу пакуль няма, таму вечары мы праводзім у цесным сямейным крузе.
Інга Масаліс, Анастасія Рынкевіч, повары:
– У нядзелю мы звычайна працуем, вечарам жа сустракаемся з сябрамі і гуляем па горадзе. У Астравец пераехалі нядаўна. Куды пайсці вечарам, вызначыцца дастаткова складана.
Павел (без фота), пенсіянер:
– Прачынаюся, снедаю і гляджу тэлевізар. У мяне, як і ў многіх пенсіянераў, ёсць сабака, выгульваю яго гадзіны дзве, дыхаю свежым паветрам, атрымліваю асалоду ад прыроды. Але самае галоўнае ў гэты дзень для мяне – схадзіць у касцёл.
Аляксандр Шастаковіч, машыніст-абходчык па турбіннаму абсталяванню:
– Як правіла, на выхадныя мы з жонкай едзем да бацькоў. Стараемся дапамагчы па гаспадарцы, пабыць разам з сям’ёй. Вечарам сустракаемся з сябрамі, ходзім у кіно. Любую свабодную хвіліну паміж працай і клопатам стараюся быць разам з каханай.