Жители Островецкого района сделали свой выбор
15:05 / 12.09.2016
Яшчэ ў аўторак быў дадзены старт датэрміноваму галасаванню – з 10 гадзін раніцы да 7 гадзін вечара з перапынкам на абед можна было аддаць свой голас за выбранага кандыдата – і многія скарысталіся такой магчымасцю.
Адным з тых, хто ў першыя хвіліны датэрміновага галасавання пераступіў парог выбарчага ўчастка №43 у Астраўцы, стаў Віктар Анімуцкі.
– Шмат гадоў прымаю ўдзел у выбарах. І штораз аддаю свой голас менавіта ў першы дзень галасавання – гэта ўжо традыцыя. Так зрабіў і сёлета.
Кабінкі для галасавання, урна для бюлетэняў, інфармацыйныя стэнды, сталы для членаў камісіі і месцы для назіральнікаў, адкуль добра бачны працэс галасавання і падліку галасоў, – усё арганізавана ў адпаведнасці з заканадаўствам.
Пра тое, што парушэнняў у працэсе выбараў не назіралася, сведчылі і назіральнікі. Адна з іх, Вольга Дэмбоўская, выконвае гэтую місію не ўпершыню.
– Сёлета на выбарчым участку я прадстаўляю грамадскае аб'яднаннне «Веды». Не першы раз выконваю такія абавязкі і хачу адзначыць, што падчас галасавання на нашым выбарчым участку ніякіх парушэнняў не выяўлена, – адзначыла Вольга Яўгенаўна. – Людзі прыходзяць у добрым настроі, члены камісіі выконваюць свае абавязкі ў адпаведнасці з заканадаўствам – ва ўсіх усмешкі на тварах. Увогуле, з дзяцінства выбары для мяне асацыіруюцца са святам. У той час на іх я хадзіла з бацькамі. У фае ўчастка працаваў буфет, праходзілі канцэрты – было весела і цікава. Тое адчуванне свята захаваліся і сёння.
Сёлета на Астравеччыне было створана 33 выбарчыя ўчасткі. Колькасць гарадскіх участкаў павялічылася: у сувязі з ростам нашага горада і павелічэннем колькасці яго жыхароў новы выбарчы ўчастак з'явіўся ў першым мікрараёне Астраўца – ён атрымаў «прапіску» ў адным з самых новых і прыгожых будынкаў – гімназіі №1.
Пры ўваходзе на выбарчы ўчастак Астравецкі філіял Гродзенскага аблспажыўтаварыства арганізаваў гандаль. Свежыя булачкі і каўбасы, садавіна і гародніна – усё апетытна і прыгожа.
Указальнікі накіроўваюць усіх, хто заходзіць у памяшканне, да месца, дзе адбываецца галасаванне. Уздоўж сцяны – інфармацыйныя стэнды. А ў светлай прасторнай бібліятэцы, якая на час выбараў «перакваліфікавалася» ў выбарчы ўчастак, жыхароў мікрараёна чакае камісія.
– Наш участак новы, але камісія працуе зладжана. Радуюць і выбаршчыкі – толькі за перыяд датэрміновага галасавання свае галасы за кандыдатаў у дэпутаты аддалі 94 жыхары. Астатнія прыйшлі ў нядзелю – і таксама зрабілі свой выбар, – расказала старшыня ўчастковай камісіі ўчастка для галасавання № 47 Алена Чаславаўна Севасцьян.
Аднымі з тых, хто вырашыў аддаць свой голас за выбранага кандыдата ў дэпутаты ў асноўны дзень галасавання, сталі Віталь і Вольга Шарэйкі, якія на ўчастак прыйшлі з двухгадовай Дзіянай – менавіта сваёй дачцэ бацькі даверылі апусціць свае бюлетэні ў урну.
– На мой погляд, кожны чалавек павінен прыйсці на выбары і аддаць свой голас за годнага кандыдата, – упэўнены Віталь і Вольга. – За апошнія гады Астравец змяніўся, папрыгажэў. Пацвярджэнне гэтаму і новая гімназія, у якой створаны новы ўчастак, да якога мы «прыпісаны». Таму прагаласавалі за будучае нашага горада.
На працягу дня людзі заходзілі на свае ўчасткі, прадстаўлялі пашпарт, ставілі подпіс, атрымлівалі бюлетэнь. Некалькі секунд у кабінцы – і запоўнены бюлетэнь адпраўляецца ў празрыстую пластыкавую урну.
Выбар зроблены!
Алена ЯРАШЭВІЧ, фота аўтара.