Як наводзяць парадак у Варнянскім сельсавеце, расказаў яго старшыня
11:11 / 18.01.2018
– Навядзенню парадку на зямлі ў мінулым годзе мы ўдзялілі шмат увагі. Спадзяюся, што і сёлета зробім не меней, – дзеліцца думкамі Аляксандр Часлававіч. – Зразумела, па ўзмаху чароўнай палачкі нішто не робіцца, таму стараемся ўсё рабіць супольна з насельніцтвам, арганізацыямі, размешчанымі на тэрыторыі сельсавета, і раённымі прадпрыемствамі, якія зацікаўлены ў навядзенні парадку на зямлі.
Дарогі, могілкі, знос старых нежылых дамоў і выдаленне аварыйных дрэў – такія праблемы існуюць у кожнай вёсцы. У 2017 годзе мы добраўпарадкавалі пад’езд да вёскі Беразоўка, пабудавалі дарогу па вуліцы Ромашы ў Вароне, падсыпалі вуліцу ў Карвэлях, адрамантавалі дарогу да хутара Даўнарышкі.
Шмат зроблена і па навядзенні парадку на могілках каля вёсак Карвэлі, Лынкішкі і Чыжоўшчына – тут ліквідавалі смеццезвалкі. На могілках у Варнянах, Вароне, Быстрыцы і Карвэлях устанавілі кантэйнеры для збору рытуальных адходаў. На тэрыторыі сельсавета размешчана 15 могілак – там наладжаны рэгулярны вываз смецця.
Штогод праводзіцца работа і па добраўпарадкаванні помнікаў, брацкіх магіл і воінскіх пахаванняў. Так, у мінулым годзе мы абнавілі плітку каля воінскага пахавання ў Вароне.
Праводзілася работа па выдаленні аварыйных дрэў, многае было зроблена па спілоўванні хмызняку і кустоў каля Газы і Вароны. Дзякуючы раскарчоўцы старога сада каля Валэйкунаў, сельскагаспадарчае прадпрыемства сёлета зможа ўвесці ў сельгасзварот каля трох гектараў зямлі.
Вёскі старэюць – гэта не сакрэт. У многіх стаяць напаўразваленыя хаты, гаспадароў якіх сёння днём з агнём не знойдзеш, – работы па іх зносу і добраўпарадкаванні тэрыторый кладуцца на сельсавет. Так, у 2017 годзе мы добраўпарадкавалі 16 участкаў у Больніках, Шульніках, Валэйкунах, Кярнянах, Газе, Загазі, Рудзішках, Карвэлях, Бадзівалах. Вызваленыя тэрыторыі будуць перададзены нашаму сельгаспрадпрыемству.
На жаль, не заўсёды жыхары станоўча адносяцца да просьбаў і прапаноў навесці парадак каля ўласнага дома ці на сядзібе сваіх бацькоў. Стараемся знайсці з такімі агульную мову.
Памятным мерапрыемствам мінулага года стала святкаванне 555-годдзя аграгарадка Трокенікі. Да гэтага свята рыхтаваліся не толькі жыхары, але і мясцовая ўлада: у вёсцы быў устаноўлены памятны знак, добраўпарадкаваны вуліца Школьная і стадыён.
Дзякуючы падтрымцы сельгаспрадпрыемства, мы маем трактар, трактарыста і трох рабочых, якія займаюцца навядзеннем парадку на зямлі, пакосам травы, устаноўкай агароджы і яе афарбоўкай. Дарэчы, летась у Вароне і Варнянах большасць агароджаў была пафарбавана: хтосьці з жыхароў зрабіў гэта самастойна, некаму дапамог сельсавет.
Змяніўся ў мінулым годзе і аграгарадок Варняны – наведзены парадак вакол аўтадрома, добраўпарадкавана прыбярэжная зона, абуладкаваны «ляжачыя паліцэйскія» і нанесена дарожная разметка па вуліцы Піянерскай, новымі дрэўцамі папоўніўся парк на вуліцы Прамысловай, а па вуліцы Савецкай насупраць касцёла з’явіліся клумбы. Працягваецца капітальны рамонт будынка сельсавета.
Аднак расхалоджвацца няма як: работы хапае і, спадзяюся, што ўсё ў нас атрымаецца.