Восеньскія клопаты варнянскіх земляробаў
Бабіна лета змяніла слатлівая восень: дні адчувальна пакарацелі, а вечары зрабіліся доўгімі. А на парадку дня аграрыяў – сяўба азімых збожжавых, уборка бульбы і буракоў, нарыхтоўка кармоў. На працягу светлавога дня механізатары прападаюць у полі, каб своечасова сабраць вырашчаны ўраджай і зрабіць задзел на наступны год.
На мінулым тыдні мы наведаліся ў КСУП “Варняны”, каб даведацца пра ход і тэмпы палявых работ.
Андрэй Ігнатовіч за дзень разворвае 20 бульбяных пар
У некалькіх сотнях метраў ад адміністрацыйнага будынка КСУП “Варняны”, ля прасёлачнай дарогі на Лазавыя, раскінулася бульбяное поле, на якім не першы дзень шчыруюць: работнікі сельскагас-падарчага прадпрыемства і так званыя біржавікі. У залежнасці ад колькасці капачоў за дзень у КСУП “Варняны” ўбіраецца каля паловы гектара.
Кінеш вокам на баразну – і, здаецца, няма ёй канца і краю…
Людміла Пагада шчыруе на бульбакапанні
– Даўжыня прыблізна 600-700 метраў, – злавіўшы мой недаўменны позірк, тлумачаць работнікі. – Працуем з 9 да 5 гадзін вечара. За дзень паспяваем зрабіць некалькі “ходак”.
У гэты дзень на бульбакапанні былі занятыя работнікі мясаперапрацоўчага цэха КСУП “Варняны”.
Механізаванага памочніка – бульбаўборачнага камбайна – у варнянцаў няма, таму бульба ўбіраецца пасля капалкі ўручную.
Муж і жонка Іван Янкойць і Таццяна Кірпа працуюць разам
Па памерах і колькасці клубняў бачна, што бульба ў Варнянах сёлета не ўрадзіла. Пра гэта сведчаць і лічбы: ураджайнасць крухмалістай вагаецца ў межах 175 цэнтнераў з гектара пры сярэднераённых 390.
ДАРЭЧЫ
* Вырошчваннем другога хлеба сёлета займаюцца толькі тры гаспадаркі: КСУП “Гудагай”, “Гервяты” і “Варняны”. У раёне пад бульбу адведзена 160 гектараў, з якіх 100 гектараў прыпадае на КСУП “Гудагай”. У варнянскай і гервяцкай гас-падарках – па 20 і 40 гектараў адпаведна.
* Па стане на 8 кастрычніка, бульба выкапана на плошчы 134 гектара. Накапана 5 231 тона.
Начальнік мясаперапрацоўчага цэха Андрэй Зінкевіч у гэты гарачы час разам з калегамі ўбірае бульбу
Віталь Казлоўскі спрытна прымае кошыкі
Прыпынак 2. Шульнікі
Кіпіць работа на пасяўной! Інакш і не скажаш пра караван тэхнікі – ад камнеўборачнай машыны да сеялак – які на мінулым тыдні дыслацыраваўся побач з вёскай Шульнікі.
На трактары з прычапным пасяўным агрэгатам ПП6 Валерый Дэнюш сеяў азімае трыцікале.
Валерый Дэнюш, сейбіт
– Пасяўная кампанія пачалася адразу пасля жніва. Па традыцыі першай пачалі сеяць пшаніцу, – расказвае сейбіт. – Галоўнае – каб моцна не дажджыла: некаторыя ўчасткі не паспелі падсохнуць пасля вераснёўскай залевы.Акрамя сейбіта, у гэты дзень на полі працавалі аратыя, вадзіцелі, культыватаршчыкі – работа спорылася!
Араты Юрый Бумбуль за дзень рыхтуе да сяўбы каля 20 гектараў
ДАРЭЧЫ
*Першымі ў раёне завяршылі азімую сяўбу КСУП “Гудагай” і КСУП “Гервяты”.
* Найбольшы ў раёне азімы клін збожжавых у КСУП “Варняны” – ён складае 2 150 гектараў. Пад пшаніцу тут адведзена 800 гектараў, пад трыцікале – 950, пад жыта і ячмень – 200 і 50 гектараў адпаведна.
Эдуард Дэнюш падвозіць збожжа да сеялкі
Іван Бублевіч заняты на культывацыі
Прыпынак 3. Чэрнішкі
Кукуруза цалкам апраўдвае сваю мянушку: капрызіла, бы каралева, цэлае лета – але восенню змяніла гнеў на міласць: падрасла, пасталела, папрыгажэла.
Сёлета ў КСУП “Варняны” пад кукурузу адведзена 1 360 гектараў, з якіх 200 будзе абмалочана на зерне. Час убіраць пачаткі яшчэ не настаў – каралева палёў цешыць вока сваёй сакавітай зеленню, таму працаўнікі працягваюць убіраць яе на сілас.
Станіслаў Кяжун не першы год заняты на корманарыхтоўцы
– Галоўнае, каб тэхніка не падводзіла, – расказвае Станіслаў Кяжун, які не першы год заняты на корманарыхтоўцы. – У сярэднім зжынаем 50 гектараў, хоць дзень на дзень не прыходзіцца.
Побач з Чэрнішкамі кормаўборачны камбайн паглынаў высокія расліны, якія ў здробненым выглядзе сыпаліся ў кузавы машын. Каля пяці адзінак тэхнікі адвозілі зялёную масу на малочна-таварны комплекс “Кярняны”, дзе яна закладвалася ў траншэі.
Уладзіслаў Млынкоўскі адвозіць зялёную масу на комплекс
ДАРЭЧЫ
* Па стане на 8 кастрычніка гаспадаркі раёна справіліся з уборкай кукурузы на 29 працэнтаў і зжалі 1 632 гектары.
* Варнянскія хлебаробы ўбралі 283 гектары кукурузы на сілас. Яе ўраджайнасць складае 350 цэнтнераў з гектара – а гэта другі паказчык у раёне. Валавы збор склаў 9 900 тон.
Дзяніс Палевіч, вадзіцель