Регина Дремо спасла жизнь 32 человекам
10:06 / 13.09.2019
Шмат гадоў таму я разгаварылася са знаёмай, якая была донарам, – яна прапанавала мне таксама здаць кроў, расказала, што гэта карысна для здароўя, а галоўнае – можна ўратаваць некаму жыццё. Я прайшла медыцынскую камісію, са здароўем у мяне было ўсё ў парадку, – і здала кроў.
Так я стала донарам. Кожны раз, калі прыходзіла здаваць кроў, уяўляла, што некаму даю надзею на выздараўленне, а магчыма, выратоўваю жыццё. У мяне нават уласная самаацэнка павысілася, з’явілася пачуццё годнасцi і самапавагi!
Неяк у пошуку працы звярнулася ў раённы цэнтр занятасці – і мне прапанавалі часова папрацаваць санітаркай у хiрургiчным аддзяленні цэнтральнай бальніцы. Аднойчы пасля чарговай крываздачы мяне паклікала жанчына, якая ляжала ў аддзяленні.
– Падчас аперацыі мне пералівалі кроў, я спытала, чыю, – мне адказалі, што вашу. Дзякуй вам вялікі, вы дапамаглі выратаваць маё жыццё, – сказала жанчына.
Яе вочы свяціліся шчасцем – а мне было так хораша на душы ад таго, што змагла дапамагчы чалавеку! Я запэўнiла гэту жанчыну, што ўсё ў яе будзе добра, бо чалавек я аптымiстычны, добразычлiвы i нiколi не сумую.
Пазней я захварэла прастудным захворваннем, якое дало ўскладненне, i мне прыйшлося спыніць здачу крыві. Да звання ганаровага донара не дацягнула – для гэтага трэба здаць кроў не менш чым 40 разоў. Тым не менш, прыемна ведаць, што на Астравеччыне жывуць 32 мае «кроўныя родзічы» – людзі, якім я ў свой час дапамагла. І хоць я іх не ведаю, ад душы жадаю: хай усё ў іх будзе добра!
Рэгiна ДРЭМА, в. Ліпкі
