Один день с коллективом пропускного пункта «Лоша»
Крыху больш за тры месяцы назад спрошчаны пункт пропуску “Лоша” стаў працаваць у статусе міжнароднага – тут цяпер беларуска-літоўскую мяжу перасякаюць грамадзяне ўсіх краін свету ў кругласутачным рэжыме.
Напярэдадні Дня пагранічніка мы наведаліся на пункт пропуску Лоша, каб даведацца, як праходзіць дзень ваеннаслужачых органаў пагранічнай службы.
З 29 снежня 2015 года аддзяленне пагранічнага кантролю “Лоша” ўзначальвае Андрэй Сцяфанавіч Ражко. Менавіта тады ў рамках пераходу пункта пропуску ў статус міжнароднага было створана асобнае падраздзяленне, а на гэтым участку беларуска-літоўскай мяжы пачаўся эксперымент, які пацвердзіў, што дадатковы пункт пропуску будзе запатрабаваны ў грамадзян розных краін.
– За час работы пункта пропуску ў статусе міжнароднага граніцу перасякалі грамадзяне 30 дзяржаў, – расказвае Андрэй Сцяфанавіч – Работа мытні тут пакуль што не арганізавана, таму дзейнічаюць абмежаванні па правозе тавараў у адпаведнасці з заканадаўствам.
Амаль 20 гадоў Андрэй Сцяфанавіч ахоўвае рубяжы нашай краіны. Пачынаў кантралёрам на пункце пропуску “Катлоўка”, была ў яго прафесійнай дзейнасці служба на пунктах пропуску на чыгуначнай станцыi Гудагай, потым – на “Лошы”, другое вяртанне на пункт пропуску “Катлоўка” і зноў – на пункт пропуску “Лоша”.
– Пасля службы ў арміі цвёрда вырашыў, што хачу быць ваенным, – расказвае сённяшні начальнік аддзялення пагранічнага кантролю “Лоша”. – Органы пагранічнай службы былі абраны невыпадкова: нарадзіўся на Астравеччыне, вучыўся ў Спондаўскай школе, пра службу на граніцы ведаў не па чутках – Дзяржаўная мяжа была недалёка. Сумненняў у выбары прафесіі не ўзнікала.
Не ўзнікла іх і падчас службы. Сёння афіцэр не ўяўляе свайго жыцця без мяжы і яе аховы.
Гэтак жа мэтанакіравана ішоў да ажыццяўлення сваёй мары і намеснік начальніка аддзялення пагранічнага кантролю “Лоша” Максім Мікалаевіч Лёнін.
Пасля школы малады чалавек паступіў у Ваенную Акадэмію на пагранічны факультэт, а заканчваць давялося Інстытут пагранічнай службы.
– На першым курсе вучыцца было складана, але не лягчэй і ў грамадзянскіх ВНУ. Потым прыйшло ўсведамленне, што гэта менавіта тое, чым я хачу займацца, – расказвае Максім Мікалаевіч.
На Астравеччыну маладога спецыяліста, выпускніка Інстытута пагранічнай службы, прывяло размеркаванне. Служба на пунктах пропуску “Каменны Лог” і “Катлоўка”, выкананне абавязкаў намесніка начальніка змены, потым – начальніка змены – і новыя месца службы і пасада.
У аддзяленнi пагранiчнага кантролю “Лоша” Максім Мікалаевіч з 17 лютага бягучага года выконвае абавязкі намесніка начальніка аддзялення пагранічнага кантролю.
– Колькасць пасажыраў, якія праязджаюць праз наш пункт пропуску, вырасла амаль утрая. Калі напачатку гэта былі грамадзяне Беларусі і Літвы, то цяпер граніцу тут перасякаюць жыхары розных краін. Асноўная нагрузка на супрацоўнікаў паста кладзецца ў пятніцу і выхадныя дні – паток машын амаль не спыняецца.
Мы наведваліся ў пункт пропуску “Лоша” ў чацвер, але і тады аўтамабілі перасякалі мяжу няспынна – адпачываць пагранічнікам не было калі. А аўтамабілістам было камфортна – граніцу яны “праходзілі” ў лічаныя хвіліны.
Астраўчанін Алег Анатольевіч Раўдановіч у органах пагранічнай службы – другі месяц. Сказаць, што гэта была мара дзяцінства, юнак не можа. Хаця падчас вучобы ў школе бываць на пагранкамендатуры “Гудагай” даводзілася часта.
– Расповеды пра вайсковае жыццё, сустрэчы з кінолагамі і іх падапечнымі – сабакамі – усё гэта было цікава. Праўда, пра службу на мяжы я тады не марыў, – расказвае Алег.
Жыццё ж распарадзілася па-свойму: пасля школы юнак скончыў аўтамеханічны каледж у Мінску і вырашыў паслужыць Радзіме.
– Звярнуўся ў пагранкамендатуру, сабраў неабходныя дакументы – не прайшло і двух месяцаў, як апынуўся у аддзяленнi пагранiчнага кантролю “Лоша”. Прэстыжна, ганарова і цікава, – характарызуе сваю службу хлопец, асноўная задача якога – агляд транспартных сродкаў.
Такія ж абавязкі ў той дзень былі ўскладзены і на Дзмітрыя Валер’евіча Цікоту, служба якога пачалася сем гадоў назад на пункце пропуску “Каменны Лог”.
Менавіта з гэтым месцам у Дзмітрыя звязана шмат успамінаў. Тут яму давялося аказваць медыцынскую дапамогу пасажыру, якому стала дрэнна. І Дзмітрый – выпускнік Мінскага медыцынскага каледжа – годна справіўся з задачай і выратаваў чалавеку жыццё.
На службе юнак пазнаёміўся і са сваёй будучай жонкай Таццянай. Спачатку маладых людзей аб’ядналі прафесійныя абавязкі, а потым – і сямейныя.
Ужо год Дзмітрый Валер’евіч служыць у пункце пропуску “Лоша” і ўдзячны жыццю, што некалі падштурхнула яго да пагранічнай службы.
Лёсавызначальным стаў пункт пропуску “Лоша” і для кантралёра Ірыны Валер’еўны Апановіч.
Ірына, у дзявоцтве Пціцына, нарадзілася і жыла ў Смаргоні. У гэтым жа двары жыў Аляксандр Апановіч. Магчыма, некалі яны і сустракаліся – толькі ні разу іх позіркі не перасякаліся, і яны не ведалі адзін аднаго. А пазнаёміліся маладыя людзі менавіта у пункце пропуску Лоша.
У 2013 годзе дзяўчына прызвалася у аддзяленне пагранiчнага кантролю “Гудагай 2”, потым – перавялася у аддзяленне пагранiчнага кантролю “Лоша”. На той час Аляксандр таксама служыў у гэтым падраздзяленнi.
– Пазнаёміліся мы на пункце пропуску “Лоша”, – расказвае Ірына Валер’еўна. – І, напэўна, калі б не служба, нашай сям’я і не было б.
Яны і цяпер служаць разам – толькі ў розныя змены.
– Канешне, складана, – усміхаецца Ірына. – Аднак усё можна вырашыць – варта гэтага хацець.
Калі Ірына Валер’еўна прыйшла на пункт пропуску “Лоша”, ён працаў як спрошчаны. Тады яго перасякалі жыхары прыгранічных тэрыторый дзвюх суседніх краін.
– З лютага гэтага года ўсё змянілася: колькасць людзей, перасякаючых мяжу, значна, павялічылася. І наша задача – зрабіць так, каб усё праходзіла ў адпаведнасці з заканадаўствам, без затрымак і з камфортам для людзей.
Амаль усе, з кім давялося ў той дзень сустрэцца, – людзі сямейныя. Прычым, і муж, і жонка – ваеннаслужачыя.
– Гэта заканамернасць ці ўсё ж супадзенне? – пытаюся ў намесніка начальніка АПК “Лоша” Максіма Мікалаевіча Лёніна.
– Хутчэй супадзенне, – адказваае ён. – Хаця, па праўдзе кажучы, калі муж і жонка аб’яднаны адной прафесійнай дзейнасцю, яны лепш разумеюць адзін другога – і праблем у сям’і ўзнікае менш.
Не бачыць цяжкасцей у такой “сумеснай” службе і кантралёр Аксана Валянцінаўна Жалдыбіна. Яе муж – таксама ваеннаслужачы: ён служыць у аддзяленнi пагранiчнага кантролю “Гудагай 1”, Аксана – у аддзяленнi пагранiчнага кантролю “Лоша”. А, між тым, дома маму і тату чакаюць чацвёра дзяцей.
– Такі графік работы ў першую чаргу стварае цяжкасці для дзяцей – яны рэдка бачаць маму і тату разам, – усміхаецца Аксана Валянцінаўна. – Для нас жа служба – абавязак, стыль жыцця, які мы выбралі самі.
Быць ваеннаслужачай Аксана марыла з дзяцінства. Па-першае, жанчына ў форме – гэта стыльна і прыгожа. А па-другое, прыкладам быў дзядуля – ветэран Вялікай Айчыннай вайны. Дзяўчына хадзіла з ім на парады, прымала ўдзел у ветэранскіх мерапрыемствах, а дзядулевы ўзнагароды выклікалі захапленне.
– У 2005 годзе мяне прызвалі у аддзяленне пагранiчнага кантролю “Гудагай 2” – чыгуначны пункт пропуску для таварных цягнікоў, потым служыла ў Смаргонскай пагранічнай групе, зноў – у аддзяленнi пагранiчнага кантролю “Гудагай 2”. Цяпер – у аддзяленнi пагранiчнага кантролю “Лоша”. Служба на мяжы – адказная справа: адначасова працуеш і з дакументамі, і з людзьмі – і трэба нічога не ўпусціць, – расказвае Аксана Валянцінаўна.
А што думаюць пра работу міжнароднага пункта пропуску грамадзяне, што перасякаюць мяжу? – аб гэтым мы пацікавіліся ў тых, хто ў той дзень праязджаў праз “Лошу”.
– У апошні час даводзіцца часта праз граніцу ездзіць, – расказаў мінчанін. – Гэта звязана з удзелам у спаборніцтвах, якія праходзяць у Прыбалтыцы. Праз гэты пункт пропуску можна перавозіць толькі асабістыя рэчы – аднак мяне гэта цалкам задавальняе. Асноўная прычына – тут няма чаргі. А па-другое, і ў гэтым я неаднаразова упэўніваўся – тут працуюць адказныя людзі, якія ўсё робяць хутка і якасна.
Дарэчы, на міжнародным пункце пропуску арганізавана работа супрацоўнікаў Белдзяржстраху – і пры неабходнасці аформіць страхавы сертыфікат можна на месцы.
Сустрэча з супрацоўнікамі гэтай змены яшчэ раз пацвердзіла, што быць пагранічнікам – адказна і ў той жа час ганарова. Ваеннаслужачыя на працягу сутак працуюць у рэжыме нон-стоп, ахоўваючы граніцу і інтарэсы нашай краіны.
Для даведкі: “Лоша-Шумскас” ужо трэці міжнародны пункт пропуску ў Астравецкім раёне. Яшчэ адзін аўтамабільны размешчаны ў Катлоўцы, а чыгуначны – у Гудагаі.