Творчасць і крэатыў праявілі прадпрыемствы і арганізацыі пры афармленні сваіх тэматычных падвор’яў
Тое, што талентаў у раёне нашмат больш, чым было прадстаўлена на цэнтральнай сцэне, прадэманстравалі выстаўка-агляд падвор’яў. Чаго тут толькі не было!
Беларуская АЭС на вачах ва ўсіх прысутных дэманстравала ідэю энергіі стварэння і тыя складнікі, што для гэтага патрэбны: працалюбства, гасціннасць астравецкай зямлі, прафесіяналізм, майстэрства… А яшчэ раздавала ў якасці сувеніраў зямлю з першага каўша катлавана першага энергаблока Беларускай АЭС.
Газета “Астравецкая праўда”, якая на працягу апошніх 77 гадоў нага ў нагу ідзе з гісторыяй Астраўца і раёна, паказала гэты працэс, занатаваны на старонках газеты і фотаздымках, у рэдакцыйным абсталяванні – і “праспявала” пра свой раён і газету агністымі прыпеўкамі.
Астравецкае райспажыўтаварыства пабудавала цэлы горад з хлебабулачных вырабаў.
Астравецкая СШ №1 запрашала усіх… у лазню! Толькі там, па меркаванні настаўнікаў, можна атрымаць сапраўдны рэлакс.
Чароўны дуб з катом вучоным зрабіла Астраовецкая сельсгастэхніка.
А саўгас “Падольскі” у адпаведнасці з умовамі конкурсу паказаў, як раней працавала сельская гаспадарка: тут табе і гусенічны трактар, і жывы герб Астраўца.
Сапраўдную школу бяспекі прадставілі ў сваім падвор’і супрацоўнікі райгазу.
Пастараліся і іншыя прадпрыемствы і арганізацыі.
Словам, было на што паглядзець, было што паслухаць. А галоўнае – кожная гаспадарка, арганізацыя, прадпрыыемства Астраўца прыдачыніліся словам і справай да юбілею горада.